QR Vıtse-premeri bas dárigerlerdi qarjylyq jumystardan bosatýdy usyndy
ASTANA. QazAqparat - Búgin QR Premer-Mınıstriniń orynbasary Darıǵa Nazarbaeva endi medıtsınalyq mekemelerde eki basshy bolatynyn, ıaǵnı bireýi negizgi qyzmetke, al ekinshisi qarjylyq-sharýashylyq baǵytyna jaýap beretinin aıtyp berdi.
«Jalpy basqarý júıesine múldem ózge qadamdy ázirlegimiz keledi. Bas dáriger - ol naýqasty emdeýmen aınalysýy kerek. Ol qarjylyq-sharýashylyq qyzmetke aralaspaýy tıis. Bas dáriger býhgalterııa, esepter, sheksiz tekserýlerge, sondaı-aq sapaly qyzmet kórsetý úshin ózi basqaryp otyrǵan mekemege qosymsha qarjy tartý máselelerine basyn qatyrmaýy qajet. Sondyqtan da osy eki qyzmetti bólý kerek»,-dedi D. Nazarbaeva.
Osy oraıda ol máseleniń ekinshi bóligimen dırektor nemese menedjer aınalysýy tıis ekenin atap ótti.
«Medıtsınaǵa pysyq adamdar kerek. Medıtsınalyq mekemeni basqaratyn adamdar naýqastar men dárigergerge qamqor bolýy mańyzdy. Sondyqtan medıtsınalyq mekemelerdiń menedjmentine talaptar qataıady», - dedi vıtse-premer.
