QR Vıtse-premeri - Aýyl sharýashylyǵy mınıstri is-saparmen OQO-da boldy
ShYMKENT. QazAqparat - Qazaqstan Respýblıkasynyń Vıtse-premeri - Aýyl sharýashylyǵy mınıstri Ómirzaq Shókeev Ońtústik Qazaqstan oblysyna is-saparmen keldi. Mınıstr óńirdegi aýyl sharýashylyǵy ónimderin óndiretin kásiporyndarǵa baryp, sharýa qojalyqtardyń jetekshilerimen kezdesti, dep habarlaıdy QazAqparat tilshisi.
Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýyndaǵy tıisti baǵyttar boıynsha atqarylatyn sharalarmen tanysý maqsatynda kelgen Ómirzaq Estaıuly óńirdegi aýyl sharýashylyǵy salasyndaǵy sharýalarmen kezdesip, máselelerine qanyqty. Óńirdegi sharýalar maqta, júgeri ónimderin arttyrý boıynsha jáne qarakól eltirisin qaıta jańǵyrtý jóninde óz oılaryn jetkizdi. Máselege qanyqqan mınıstr aıtylǵan usynystardy eskerip, tıisti jumystar atqarylatynyn aıtty.
«Aýyl sharýashylyǵyna beriletin sýbsıdııa búgingi tańda 240 mlrd teńgege jetti. Bul - Elbasynyń atalǵan salaǵa degen qamqorlyǵy. Sondaı-aq, Memleket basshysy aýyl sharýashylyǵy ónimderin 2,5 esege kóbeıtý kerektigin tapsyrdy. Bul turǵyda Ońtústik Qazaqstan oblysy - agrarly sala ekendigin eskerý kerek. Et, sút, maqta ónimderi men baqsha daqyldaryn óndirýde óńirdiń úlesi erekshe. Aldaǵy ýaqytta Úkimet májilisinde jyldyń jańa josparyn bekitip, aýyl sharýashylyǵyn órkendetý úshin tyń jobalardy qolǵa alatyn bolamyz», - dedi Ómirzaq Estaıuly.
Mınıstr sapar barysynda, sondaı-aq, Ordabasy aýdanyndaǵy «Bórte mılka» sút-taýar fermasynda boldy. Túrkistan qalasy Shaǵa aýyldyq okrýgindegi «Erasyl» jylyjaı keshenin kórip, jobalyq quny 70 mln teńgeni quraıtyn keshenniń jumysymen tanysty. Osy rette oblys ákimi Janseıit Túımebaev respýblıkadaǵy jylyjaılardyń 75 paıyzy Ońtústik Qazaqstan oblysyna tıesili ekendigin aıtty.
«Aýyl sharýashylyǵyn qoldaýǵa ótken jyly jalpy 24,9 mlrd teńge sýbsıdııa baǵyttalyp, 40 myńǵa jýyq kásiporyn qoldaýǵa ıe boldy. Aýyl sharýashylyǵynyń jalpy ónim kólemi ótken jyly 522,4 mlrd teńgege jetip, ósim 102 paıyzdy qurady. Al jylyjaı kólemi 2017 jyly 212 gektarǵa artyp, jalpy 1 335 gektarǵa jetti. Elbasy Joldaýynda aýyl sharýashylyǵy salasyna aıryqsha kóńil bólindi. Osy maqsatta óńirde ónimdilikti arttyrý úshin ozyq tehnologııany paıdanalanýǵa barynsha basymdyq beretin bolamyz», - dedi Janseıit Qanseıituly.
Óńirdegi aýyl sharýashylyǵy salasymen tanysqan Ómirzaq Estaıuly sharýalardyń jasaǵan usynystarynyń tıimdi tustary nazarǵa alynatyndyǵyn jetkizdi.
