QR «Veterınarııa týraly» Zańyna engizilgen normalar áli kúnge deıin tolyq júzege aspaı otyr - R.Toqseıitova
ASTANA. Qańtardyń 22-si. QazAqparat /Marlan Jıembaı/ - Ótken jyldyń tamyz aıynda elimizdiń «Veterınarııa týraly» Zańyna birqatar ózgerister engizilgen bolatyn. Bul ózgeristerge baılanysty Aýyl sharýashylyǵy mınıstrligine kóptegen azamattar habarlasyp, Zańǵa engizilgen normalardy toqtatý qajettigin, tipti keıbiri ony alyp tastaý kerektigin aıtqan.
Osyǵan oraı búgin atalǵan vedomstvoda baspasóz máslıhaty ótip, onda Mal sharýashylyǵyn damytý jáne veterınarııalyq qaýipsizdik departamentiniń dırektory Rábıǵa Toqseıitova birqatar túsinik berdi.
Onyń aıtýynsha, 2006 jyly qabyldaǵan elimizdiń «Agroónerkásiptik keshendi jáne aýyldyq aýmaqtardy damytýdy memlekettik retteý týraly» Zańyna sáıkes jergilikti atqarýshy organdardyń mindetti quziretine aýyl sharýashylyǵy maldaryn soıý alańdary qurylysyn salý, ustaý jáne jóndeý qyzmetteri berilgen. Degenmen 3 jyl ótse de áli kúnge deıin bul norma zańnamany qajet etkendikten tolyq kólemde júzege aspaǵan.
Osy ýaqytqa deıin mal soıý sharýa qojalyqtarynyń ózinde júrgizilip kelgendigin aıtqan departament dırektorynyń sózine qaraǵanda, mundaı jaǵdaı malǵa da, adamǵa da ortaq aýrýlardyń órshý qaýipin týdyrady. Sebebi qalalardyń, oblys ortalyqtarynyń bazarlaryn qamtamasyz etip otyrǵan mal etiniń 80 paıyzy osy sharýashylyq qojalyqtaryna tıesili. Ol jerlerde mal soıý úrdisi mal dárigeriniń qadaǵalaýynsyz júzege asady. «Bundaı jaǵdaı bizdi beı-jaı qaldyrmady. Sondyqtan azyq-túlik qaýipsizdigin qamtamasyz etýdegi veterınarııalyq baqylaýdy qataıtý maqsatynda osy normalardy QR «Veterınarııa týraly» Zańyna engizdik», dedi óz sózinde R.Toqseıtiova.
Atalǵan zańdy júzege asyrý barysynda qabyldanǵan Úkimettiń arnaıy qaýlysynda mal soıýdyń tártipteri qarastyrylǵan. Onda barlyq et óńdeıtin kombınattary joq eldi-mekenderde maldy baýyzdaý mal soıý beketterinde nemese ýaqytsha mal soıý alańdarynda júzege asýy qajet. Osy oraıda mal soıý beketinen alańnyń aıyrmashylyǵyna toqtalǵan departament basshysy «Mal soıý alańynyń edeni betondalyp, septıginiń bolýy, qabyrǵalary zararsyzdandyrylatyn materıaldarmen qaptalýy jáne syrlanýy qajet. Sonymen qatar, ol jerde mal dárigeri mindetti túrde bolyp, maldy baýyzdar aldynda jáne soıyp bolǵannan keıin ishek-qurylysyn qarap, aýrýsyz bolǵan jaǵdaı anyqtama berýge tıis», dedi.
