QR Velosport federatsııasy A. Kashechkındi «Astana» veloklýbyna nege jolatpaı otyr? -T. Sımambaev
ASTANA. Jeltoqsannyń 24-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda QR Týrızm jáne sport mınıstriniń atyna saýal joldaǵan senator Tasbaı Sımambaev, «Astana» veloklýbyna jáne qazaqstandyq sportshylardy osy komandaǵa qaıta tartýǵa qatysty másele kóterdi,
dep habarlaıdy QazAqparat.
«Qazaqstandyq kórnekti sportshylardyń biri, álemdik deńgeıdegi veloshabandoz Andreı Kashechkın «Astana» komandasy quramynda júrip, úlken jeńisterge qol jetkizdi. Sonyń nátıjesi bolar, ony Elbasy N. Nazarbaev qabyldap, sporttaǵy jetistikterin eskerip, jańa páter kiltin tabys etken bolatyn. A. Kashechkın «Astana» komandasymen úsh jylǵa 3 mln. 460 myń 492 eýroǵa kelisimshartqa otyrǵan eken. Biraq, ol osy komandada júrip, kórsetilgen somanyń tek 3 paıyzyn ǵana alypty. Bul rette QR Velosport federatsııasy qalǵan 3 mln. 200 myń eýrony qaıda jiberdi degen oryndy saýal týady. Budan bólek, «Astana» komandasy quramynan 6 velosportshy shyǵarylǵan, olardyń aılyqtary da qaıda ketkeni belgisiz. Toqtala ketetin jaıt, jyl saıyn veloklýbqa 13 mln. eýro bólinip turǵan», dedi T. Sımambaev.
Sonymen birge, senator búgingi kúni komandada jalǵyz qazaqstandyq sportshy qalǵanyn, basqasy legıonerler ekendigin, al ondaı legıonerlerdi QR Velosport federatsııasynyń vıtse-prezıdenti N. A. Proskýrın udaıy qolpashtap otyratynyn aıtty. Onyń sózine qaraǵanda, jańaǵy legıonerler úshin bólinetin qarajattyń da shyrǵalańy kóp bolyp otyr. «Osy turǵydan alǵanda, sporttyq jetistikteri boıynsha legıonerlerge ese jibermeıtin negizgi qazaqstandyq velosportshylardy dopıngtik daýǵa salý, olardy komandadan qýý kimniń bastamasymen júzege asyp jatqanyn ańǵarýǵa da bolady. Óıtkeni, Lozannadaǵy Arbıtrajdy sottyń A. Kashechkındi aqtaǵanyna qaramastan, QR Velosport federatsııasy (vıtse-prezıdenti N.A. Proskýrın) álemdik deńgeıdegi sportshyny áli kúnge deıin komandaǵa jolatpaı otyr. Máseleniń mánisi de osy turǵydan anyqtala túsetindeı, óıtkeni A. Kashechkın «Astanaǵa» qaıta kelse, kelisimsharttaǵy 3,2 mln. eýro men basqa da qazaqstandyq sportshylarǵa tıesili qarajattyń problemasy qaıta kóteriletin bolyp otyr ǵoı», dep tuspaldaıdy senator.
Osyǵan oraı, depýtat Týrızm jáne sport mınıstrinen «Astana» velokomandasyna qazaqstandyq sportshyny qaıta ákelip, komandadaǵy máselelerdiń mán-jaıyn zertteýdi surady.
