QR úzdik áskerı qyzmetshilerin Halyqaralyq armııa oıyndaryna irikteý júrip jatyr

QARAǴANDY. QazAqparat – «Astana» óńirlik qolbasshylyǵynyń «Spassk» oqý ortalyǵynda «Álem jaýyngeri» baıqaýyna qazaqstandyq áskerı qyzmetshilerdi irikteýdiń birinshi kezeńi aıaqtaldy. Áskerı-kásibı sheberliktegi jarystar Halyqaralyq armııa oıyndary sheńberinde ótti, dep habarlaıdy QazAqparat tilshisi.

250 áskerı qyzmetshiniń ishinen 27 adam: 17 er adam jáne 10 áıel adam irikteldi.

Endi olar taǵy bir kezeńde básekege túsedi, sebebi negizgi quramǵa tek tórteýi kiredi.

Baıqaýdyń áskerı-sporttyq kezeńine júz metrge júgirý, qashyqtyqqa granata laqtyrý, kedergiler jolaǵynan ótý, jyldam qozǵalý jáne «sportshy» keshendi estafetasy, sondaı-aq áskerı-kásibı kezeń – avtomatpen jattyǵý kiredi. «Mergen» atys daıarlyǵy boıynsha jarystar atý boıynsha ártúrli normatıvterdi oryndaýdy kózdeıdi.

Álem jaýyngeri tek joǵary, kúshti jáne jyldam bolýy tıis, sonymen qatar tarıh boıynsha bilimin tekseretin «Erýdıt» saıysynda emtıhan tapsyryp, «Kavaler/Sýdarynıa» baıqaýynyń shyǵarmashylyq kezeńine qatysýy kerek.

«Іrikteýge barlyq áskerı bólimderdiń, óńirlik qolbasshylyqtardyń jáneQazaqstan Qarýly Kúshteri túrleriniń úzdik ókilderi qatysty. Úmitkerler joǵary deńgeı, erik kúshin jáne jeńiske degen umtylysty kórsetedi», - dedi «Astana» ÓQ shtab-serjanty Qýandyq Madııarov.

Esterińizge sala keteıik, qazaqstandyq komanda «Álem jaýyngeri» halyqaralyq baıqaýynda birneshe ret júldeli oryndarǵa ıe boldy. Máselen, 2016 jyly Reseıde bizdiń áskerı qyzmetshiler jalpy komandalyq esepte úshinshi, 2017 jyly Belarýsta – ekinshi, 2018 jyly Armenııada – birinshi boldy.

Halyqaralyq armııa oıyndary aldaǵy 22 tamyz ben 4 qyrkúıek aralyǵynda ótedi dep josparlanýda. Sondaı-aq álemniń 15 elinde 34 halyqaralyq baıqaý uıymdastyrylmaq.