QR UOK prezıdenti HOK komıssııasynyń otyrysyna qatysty
ASTANA. QazAqparat - Qazaqstan Respýblıkasy Ulttyq Olımpıadalyq komıtetiniń prezıdenti Tımýr Qulybaev Lozanna qalasynda (Shveıtsarııa) Halyqaralyq Olımpıadalyq komıtettiń (HOK) qoǵammen baılanys, sport arqyly áleýmettik damý komıssııasynyń otyrysyna qatysty, dep habarlaıdy QazAqparat.
Atalǵan komıssııa HOK atqarýshy komıteti men prezıdentin Olımpıadalyq komıtettiń sessııalaryn ótkizý, álemde sport pen olımpızm rólin nasıhattaý strategııalary jóninde keńes beredi.
Sonymen qatar, komıssııa olımpıadalyq qozǵalysqa qatysty mańyzdy baǵyttardy da qamtıdy. Atap aıtsaq, olar: etıka, sportshylarmen jumys, bosqyndardyń olımpıadalyq quramyn jasaqtaý men úılestirý, dopıngke qarsy saıasat, olımpıadalyq arna.
Osy jolǵy otyrysta komıssııa qyzmetiniń jyl saıynǵy esebi tyńdalyp, aldaǵy ýaqytta atqarylatyn mańyzdy baǵyttar da talqylandy.
Halyqaralyq Olımpıadalyq komıtettiń (HOK) qoǵammen baılanys, sport arqyly áleýmettik damý komıssııasy álemniń kóptegen elinen sport salasyna eńbegi sińgen 36 adamnan turady.
Esterińizge sala keteıik, Qazaqstan Respýblıkasy Ulttyq Olımpıadalyq komıtetiniń prezıdenti ústimizdegi jyldyń sáýirinde osy komıssııanyń quramyna kirdi. HOK prezıdenti Tomas Bah jáne komıssııa tóraǵasy, HOK múshesi Marıo Peskante QR UOK basshysyna arnaıy quttyqtaý hatyn jibergen bolatyn.
