QR Ulttyq ulanynyń orkestri Máskeýde óner kórsetti
MÁSKEÝ. QazAqparat – Qazaqstan Ulttyq ulanynyń úlgili-kórsetilimdik orkestri «Spasskaıa bashnıa» Halyqaralyq áskerı-mýzykalyq festıvali aıasynda Máskeýdiń Lenıngrad vokzalynda óner kórsetti, dep habarlaıdy «QazAqparat» HAA-nyń arnaýly tilshisi.
Bıylǵy jyly «Spasskaıa bashnıa» festıvaline Qazaqstan atynan QR Ulttyq ulanynyń úlgili-kórsetilimdik orkestri men Qurmetti qaraýyl rotasy qatysty. Olar úshin bul Qyzyl alańdaǵy alǵashqy óner kórsetýleri boldy.
«Óz repertýarymyzda ulttyq ereksheligimizdi kórsetip, reseılik jáne sheteldik kórermenderdi qazaq dalasynyń folklorymen tanystyrǵymyz keledi», - dedi Ulttyq ulannyń úlgili-kórsetilimdik orkestriniń basshysy, aǵa leıtenant Tórehan Jáýdinov.
Qazirgi «Spasskaıa bashnıa» festıvaline 12 elden 30 ujym qatysýda. Olardyń qatarynda Qazaqstan, Ázerbaıjan, Belarýs, Mysyr, Italııa, Qytaı, KHDR, Norvegııa, Koreıa Respýblıkasy, Reseı, Túrkııa, Japonııa jáne halyqaralyq eki top – volynka men barabannyń kelt orkestri jáne kelt bıleriniń komandasy bar.
Qazaqstandyq orkestr «Spasskaıa bashnıa» festıvalin A.Bestibaevtiń «Jorǵa» áninen bastady. Odan keıin máskeýlik kórermender «Jez kıik» kompozıtsııasymen birge qazaqtyń bı folklorymen tanysty. Budan bólek, orkestr «Iz-za ostrova na strejen» orystyń halyq ánin oryndady.
«Spasskaıa bashnıa» jyl saıynǵy Halyqaralyq áskerı-mýzykalyq festıvali alǵash ret Máskeýde 2006 jyly ótken edi. 12 jyl ishinde festıvalge 54 elden 160-tan astam ujym qatysyp, álemniń eń tanymal áskerı-mýzykalyq festıvalderiniń úshtigine endi. Qazirgi tańda ol Reseıdiń eń iri halyqaralyq mádenı jobasy bolyp tabylady. Festıval 23 tamyz-1 qyrkúıek aralyǵynda ótip jatyr.
