QR Ulttyq ulany «Batys» óńirlik qolbasshylyǵynda úzdik sardarlar anyqtaldy
«Batys» óńirlik qolbasshylyǵy baspasóz qyzmetiniń bastyǵy, podpolkovnık Erbolat Sultanovtyń aıtýynsha, baıqaý maqsaty sardarlardyń kásibı sheberligin shyńdap, jaýyngerlik daıyndyǵyn arttyrý, sondaı-aq teorııalyq bilimi men tájirıbesin molaıtý bolatyn.
Atalmysh baıqaýǵa Atyraý, Aqtóbe, Oral, Aqtaý garnızondarynyń alty áskerı bóliminen jeńimpaz atanyp kelgen otyzǵa jýyq úmitker qatysyp, baq synady. Olar nysana kózdeý, saptyq jáne dene, memlekettik-quqyqtyq daıyndyqtan saıysqa túsip, Ulttyq ulan taktıkasy, QR Qarýly kúshteriniń áskerı jarǵysy boıynsha synaq tapsyrdy. Úzdikter barlyq saıystyń nátıjeleri boıynsha anyqtaldy.
«Áskerı bólimderdegi tártip pen jaýyngerlik ázirliktiń jaı-kúıi, oqý-jattyǵýdyń sapasy eń aldymen osy sardarlardyń kásibı daıarlyǵynyń deńgeıine baılanysty. Sondyqtan biz aldaǵy ýaqytta da olardyń biliktiligine qatysty talaptardy kúsheıtip, kásibı sheberligin kóterý úshin barlyq qajetti sharany alatyn bolamyz», dedi sharany qorytyndylaǵan «Batys» óńirlik qolbasshysy, general-maıor Qaırat Aqtanov.
Sonymen, Aqtóbe qalasyndaǵy 6655-áskerı bólimi atqyshtar batalonynyń komandıri, maıor Nurlan Isabekov «Úzdik batalon komandıri», osy bólimnen aǵa leıtenant Ahat Qusaıynov «Batalon komandıriniń tárbıe jáne áleýmettik-quqyqtyq jumystar jónindegi úzdik orynbasary», Oraldaǵy 5517-áskerı bóliminen kapıtan Danııar Muqanov «Úzdik shtab bastyǵy» atandy. Oǵan qosa 5517-áskerı bóliminen kapıtan Ilnar Batyrov «Úzdik rota komandıri», 6655-áskerı bóliminen aǵa leıtenant Nurtileý Ǵalymjanov «Rota komandıriniń tárbıe jáne áleýmettik-quqyqtyq jumystar jónindegi úzdik orynbasary», 5517-áskerı bóliminen leıtenant Jandos Zaǵpar «Úzdik vzvod komandıri» atalymyn ıelendi.
Jeńimpaz-júldegerler dıplomdarmen, baǵaly syılyqtarmen marapattalyp, shara sońy merekelik kontsertke ulasty.
Ár atalym boıynsha úzdik atanǵandar Astana qalasynda ótetin qorytyndy baıqaýǵa qatysady.
