QR Ulttyq Olımpıadalyq komıteti Atqarý komıtetiniń jańa quramy saılandy
NUR-SULTAN. QazAqparat - Búgin elordada QR Ulttyq Olımpıadalyq komıteti Bas assambleıasynyń otyrysy ótti. Kún tártibinde UOK-tyń negizgi basqarý organdaryn saılaý máseleleri qaraldy, dep habarlaıdy QazAqparat Olympic.kz-ke silteme jasap.
Otyrysqa Qazaqstan UOK prezıdenti Tımýr Qulybaev, QR Premer-Mınıstriniń orynbasary Eraly Toǵjanov, sonymen qatar ulttyq sport federatsııalarynyń prezıdentteri men ókilderi qatysty.
QR UOK Jarǵysynyń erejelerine sáıkes, bas hatshy jáne vıtse-prezıdent laýazymdaryna úmitkerlerdi UOK prezıdenti usynady. Osylaısha, Sáken Musaıbekov bas hatshy bolyp qaıta saılandy. Barlyq vıtse-prezıdentter de qaıta saılandy:
UOK-tyń jalpy máseleler jónindegi vıtse-prezıdenti Danııar Abýlǵazın,
UOK-tyń qysqy sport jónindegi vıtse-prezıdenti Asqar Mamın,
UOK-tyń jazǵy sport jónindegi vıtse-prezıdenti Ádilbek Jaqsybekov,
UOK paralımpıadlyq sport jónindegi vıtse-prezıdenti Qaırat Boranbaev,
UOK halyqaralyq yntymaqtastyq jónindegi vıtse-prezıdenti Andreı Krıýkov boldy.
«Ulttyq Olımpıadalyq federatsııalar men Qazaqstan Olımpıadalyq komıteti búginde sporttaǵy barlyq protsesterdiń belsendi qatysýshysy. Úkimettiń qoldaýymen biz ulttyq quramalardy daıyndap, olarǵa materıaldyq, tehnıkalyq, bıomedıtsınalyq jáne ońaltý boıynsha qoldaý kórsetýdemiz. Osylaısha, sport kúntizbesindegi sharalar tolyǵymen oryndalýda. Bizdiń aldymyzda UOK-tyń kelesi eki olımpıadalyq kezeńindegi saıasatyn naqty anyqtaıtyn mańyzdy mindetter tur. Birlesken kúsh-jigerdiń arqasynda ǵana biz ulttyq quramalardy qoldaý men jattyǵýlar júıesiniń tıimdiligin arttyryp, elimizdegi olımpıadalyq qozǵalysty damytýdyń irgeli máselelerin sapaly sheshýdi qamtamasyz etemiz», - dedi jınalysta UOK basshysy Tımýr Qulybaev.
Olımpıada komıtetiniń basshysy sporttyq medıtsınany damytý jáne sporttaǵy dopıngke qarsy kúres UOK pen ulttyq federatsııalar jumysyndaǵy mańyzdy baǵyttyń biri bolyp qala beretinin atap ótti.
Atqarý komıtetine sport federatsııalarynyń ókilderi retinde kelesi músheler saılandy:
«Qazaqstan voleıbol federatsııasy» RQB prezıdenti Nurtaı Ábiqaev,
«Qazaqstan Respýblıkasy jeńil atletıka federatsııasy» RQB prezıdenti Danıal Ahmetov,
«Qazaqstannyń qazirgi bessaıys federatsııasy» RQB prezıdenti Berik Imashev,
Qazaqstan Respýblıkasy shańǵy tebý ulttyq assotsıatsııasynyń ZTB prezıdenti Dıas Súleımenov,
«Aýyr atletıka federatsııasy» RQB prezıdenti Janat Túsipbekov,
«Tennıs federatsııasy» RQB prezıdenti Bolat Ótemuratov,
«Qazaqstan gımnastıka federatsııasy» RQB prezıdenti Úmit Shaıahmetova,
Sportshylar komıssııasynyń tóraǵasy Serik Sápıev.
Sonymen qatar, Qazaqstan badmınton federatsııasynyń prezıdenti Ulan Baıjanovtyń tóraǵalyǵymen UOK Tekserý komıssııasynyń quramy saılandy. Usynylǵan kandıdattardy irikteýge ulttyq federatsııalar ótinish bergennen bastap kandıdattardy usynýdyń barlyq protsesterin táýelsiz saılaý komıssııasy Bahtııar Artaevtyń tóraǵalyǵymen júrgizgenin atap ótken jón. Atqarý komıteti men eldiń negizgi olımpıadalyq departamentiniń Tekserý komıssııasynyń quramy tórt jylda bir saılanady.
