QR Ulttyq mýzeıiniń eksponattaryna sheteldikter zor qyzyǵýshylyq tanytyp otyr
ASTANA. QazAqparat - QR Ulttyq mýzeıi ashylǵannan beri ondaǵy eksponattardy 10 myńnan astam sheteldik tamashalady. Bul týraly búgin Ortalyq kommýnıkatsııalar qyzmetindegi baspasóz máslıhatynda atalǵan mýzeıdiń dırektory Darhan Myńbaı málim etti.
«Ulttyq mýzeıge ashylǵaly kóp ýaqyt ótpese de, bizge 160 myńnan astam adam kelip, onyń 10 myńnan astamy sheteldikter. Bul turǵyda mýzeıge degen úlken qyzyǵýshylyqty baıqap otyrmyz»,-dedi ol.
Osy oraıda D. Myńbaı kóshpeli kórmeler jańa trendke aınalǵanyn aıta kele, bul turǵyda barsha álemnen jańa ekspozıtsııalar alynyp, avtorlar shaqyrylatyndyǵyn, sondaı-aq Qazaqstannyń mádenı murasyn búkil álemge tanytý úshin Ulttyq mýzeı de shetelge shyǵatyndyǵyn atap ótti.
«Búginde Ulttyq mýzeıde 170 myńnan astam eksponat jınaldy. Oǵan qosa biz taǵy da «Ulttyq mýzeıge syı tartý» degen aktsııany uıymdastyrǵanbyz. Onyń barysynda K.Ázirbaevtyń, J.Nájimedenovtiń, Sh.Qaldaıaqovtyń, Keńes Odaǵynyń Batyry Q.Qaısenovtyń jáne basqa da úlken azamattardyń jeke zattary da mýzeıge syıǵa berildi. Bul turǵyda osy qundy zattardy saqtaýǵa barlyq jaǵdaılar jasalǵan»,- dedi D. Myńbaı.
Onyń sózine qaraǵanda, mýzeıdiń negizgi maqsaty eksponattardy kórsetý ǵana emes, sonymen qatar ǵylymı jumystardy jalǵastyrýǵa, ǵylymı kózqaraspen saraptaýǵa, tól mádenıetimiz ben muramyzdy búkil álemge kórsetýge baǵyttalǵan. «Mýzeıge kelgen adam qazaqtyń, qazaqstandyqtardyń kim ekenin tanyp shyǵýy kerek. Sondyqtan da búgingi jetistigimizdi nemese aldaǵy josparymyzdyń barlyǵyn Elbasynyń tapsyrmasymen baılanystyramyz» ,-dedi ol.
Sóz sońynda D. Myńbaı Halyqaralyq mýzeıler kúni aıasynda 18 mamyrda Ulttyq mýzeıde «Mýzeı túni» aktsııasy ótetindigin jetkizdi. Sol kúni onda taqyryptyq ekskýrsııalar uıymdastyrylady jáne qala turǵyndary jańa eksponattarmen tanysý múmkindigine ıe bolady.
