QR Ulttyq mýzeıine 2015 jyly tabylǵan arheologııalyq oljalar toptamasy tapsyryldy (FOTO)
ASTANA. QazAqparat - Búgin Qazaq ǵylymı-zertteý mádenıet ınstıtýty Qazaqstan Respýblıkasynyń Ulttyq mýzeıine 2015 jyly tabylǵan arheologııalyq oljalar toptamasyn tapsyrdy.
Ulttyq mýzeıdiń málimetinshe, arheologııalyq oljalar Qazaq ǵylymı-zertteý mádenıet ınstıtýtynyń bastamasymen Qulan jáne Otyrar qalashyqtarynda tabyldy. Qulan nysanynda arheologtar S.Sh. Aqylbektiń jetekshiligimen alǵash ret ortaǵasyrlyq qalashyq tsıtadeliniń ortalyq bólmesin tapty. Bul nysan Jambyl oblysyndaǵy Qulan dep atalatyn aýylǵa jaqyn jerde ornalasqan. Ol týraly eń alǵash VIII ǵasyrda qytaılyq jáne arab tarıhshylarynyń derekterinde aıtylady. Al ǵylymı turǵyda qalashyq ótken ǵasyrdyń 60-jyldary arheolog K.M. Baıpaqovtyń jetekshiligimen zerttelgen edi. Tsıtadel men shahrıstanǵa shýrf salynyp, qalanyń aınalasynda birneshe nysandar zertteldi. Sol ýaqytta qalada turǵan aýqatty adamdardyń sharap óndiretin oryndary men úı-jaılary, sondaı-aq bıleýshiniń qala syrtyndaǵy rezıdentsııasy anyqtaldy. 2000 jyldary qalanyń mańynda zertteý jumystaryn akademık K. Baıpaqov pen A. Nurjanov júrgizdi. Ótken jyldyń tamyz aıynda bıleýshiniń saraıyndaǵy ortalyq ǵımarat zertteldi. Biregeı qabyrǵadaǵy japsyrylǵan órnektiń saqtalýy mamandardyń tarapynan joǵary baǵaǵa ıe boldy. Órnektelgen kompozıtsııa S.Sh. Aqylbektiń sózi boıynsha sol ýaqytta ár túrli din men mádenıettiń bolǵandyǵyn dáleldeıdi. Eskertkish shamamen alǵanda, VII-VIII ǵasyrlarǵa jatady.
K.M. Baıpaqovtyń jetekshiligimen Otyrar qalashyǵynda júrgizilgen ǵylymı-zertteý jumystarynyń nátıjesinde erte orta ǵasyrǵa jatatyn elýden astam mádenı jáne turmystyq jádigerler tabyldy.
