QR Ulttyq mýzeıindegi mazmundy eksponattary men tarıhı jádigerleri elimiz úshin mańyzdy - G.Ábdiqalyqova (FOTO)
«Ulttyq mýzeıde 200 myńǵa jýyq túrli eksponattar bar. Bıyl elimiz úshin aıtýly jyl, ıaǵnı QR Ata Zańynyń 20 jyldyǵy, Qazaqstan halqy Assambleıasynyń 20 jyldyǵy, Qazaq handyǵynyń 550 jyldyǵy, sondaı-aq Ulty Jeńistiń 70 jyldyǵyna oraı mýzeıde kóptegen is-sharalar ótkizilip, jańa eksponattarmen tolyqty»,- dedi Memlekettik hatshy. Belgili bolǵandaı, 1 qazandaǵy málimet boıynsha, Ulttyq mýzeıdi 379 533 myń adam (2014 jylǵy shilde-jeltoqsan aralyǵynda 124 618 adam, 2015 jylǵy qańtar-qazan aralyǵynda 254 915 adam) tamashalady. Al 18 mamyr Halyqaralyq mýzeı kúninde ótken «Mýzeıdegi tún» aktsııasy kezinde bir mezgilde mýzeıdi 23 myń adam kelip kórdi. «Sondyqtan da osyndaǵy mazmundy eksponattar, tarıhı jádigerler óte mańyzdy. Bizdiń mádenıetimizdi nasıhattaýǵa úlken úles qosady dep bilemiz», - dedi Gúlshara Ábdiqalyqova. G.Ábdihalyqova Ulttyq mýzeıdiń osyǵan deıin atqarǵan jumystarynyń esebin tyńdap, aldaǵy josparlar baıandaldy. Sondaı-aq Memlekettik hatshy Taldy-2 jáne Berel qorǵandarynan tabylǵan jádigerler jaıly aqparat alyp, Ulttyq mýzeıdiń «Ǵasyrlar qoınaýynan syr shertken Qazaqstan» jobasy aıasynda Qazaq handyǵynyń 550 jyldyǵyna arnalǵan Otyrar memlekettik arheologııalyq qoryǵy men «Áziret Sultan» memlekettik tarıhı-mádenı qoryǵy murajaılarynyń «Tarıhı jady jáne taǵylym», sonymen qatar Qazaqstan halqy Assambleıasynyń 20 jyldyǵyna arnalǵan «Ulttyq natıýrmort» atty kórmelerin jáne «Máńgilik el» trıptıhyn tamashalady. Mýzeıdiń jalpy aýmaǵy 74 myń sharshy metrdi quraıdy, onyń ishinde ekspozıtsııalyq alań - 14 myń sharshy metr. Mýzeıde Qazaqstan tarıhy, arheologııalyq altyn, etnografııa, zamanaýı óner, Astana tarıhy boıynsha ekspozıtsııalar ornalastyrylǵan.
