QR Ulttyq mýzeıinde «Jyr kerýeni» dáris-kontserti ótedi

ASTANA. QazAqparat - 28 qańtarda Qazaqstan Respýblıkasy Ulttyq mýzeıinde «Jyr kerýeni» atty lektsııa-kontsert ótedi, dep habarlaıdy mýzeıdiń aqparattyq-ımıdjdik qyzmeti.

Bul «Halyq qazynasy» ǵylymı-zertteý ınstıtýtynyń qazaq halqynyń dástúrli mýzykalyq ónerin jańǵyrtý men nasıhattaýǵa arnalǵan «Dástúrli mýzykalyq mura» atty baǵdarlamasy aıasynda ótkizgeli otyrǵan tuńǵysh sharasy.

Jyraýlyq dástúrdiń tarıhy Kúltegin, Tonykók, Orhon Enıseı jazýlarynan, Estemis-Bumyn qaǵandarǵa arnalǵan madaq jyrlarynan bas­talady. Sol jerdegi sóz tirkesteri de, ondaǵy madaq ta jyraýdyń aýzynan shyqqan deýge tolyq negiz bar. Odan keıingi kezeńderde Qorqyt ata, Sypyra jyraý, Ketbuǵa, Asan qaıǵy, Shalkıiz, Dospambet, Qaztýǵan, Úmbeteı, Buqar jyraýlar jalǵasady.

Jyraýlar sózinde bıik rýh, qaırat, kúsh bar. Jyraýlar eldiń muń-sherin, arman-maqsatyn esh búkpesiz ashyq aıtqan. Búgingi tańda jyraýlardyń muralary arqyly tarıhı sanany oıatý, jyrlardy qalyń kópshilikke nasıhattaý asa qajet.

Dáris-kontsertti belgili jyraý, QR eńbek sińirgen qaıratkeri, Qazaq Ulttyq óner ýnıversıtetiniń professory, «Parasat» ordeniniń ıegeri Almas Almatov júrgizedi.

Sharaǵa Qazaq Ulttyq óner ýnıversıtetiniń «Jyrshylyq óner» kafedrasynyń stýdentteri qatysady.