QR Ulttyq mýzeıinde sýretshi K.Kúıikovtyń «Radıatsııa» atty kórmesi ótedi

ASTANA. QazAqparat - Qazaqstan Respýblıkasy Ulttyq mýzeıinde qazaqstandyq sýretshi Káripbek Kúıikovtyń «Radıatsııa» atty kórmesi ashylady, dep habarlady QR Ulttyq mýzeıiniń qoǵammen baılanys bólimi.

Ol - álemdegi antııadrolyq qozǵalystyń belsendisi, Qazaqstannyń bastamashylyǵymen qurylǵan halyqaralyq «Atom» jobasynyń qurmetti elshisi.

Kórmeni Qazaqstan Respýblıkasy Syrtqy ister mınıstriligi Ulttyq mýzeımen birlesip uıymdastyrýda.

Qaraǵandylyq sýretshi Káripbek Kúıikov Qazaqstandaǵy antııadrolyq ustanymyn nasıhattap, búkil álemge erekshe talantymen tanylǵan tulǵa.

Káripbek Kúıikov - Qaraǵandy oblysyndaǵy Semeı ıadrolyq polıgonynan zardap shekken Egindibulaq aýylynda dúnıege keldi. Sol sebepti qoly joq bop týǵan. Onyń sýret salýy da ózgeshe. Óz týyndylaryn qylqalamdy tisimen tistep, keıde aıaǵynyń bashpaılary arqyly beıneleıdi.

Onyń mańyzdy týyndysy «Alǵashqy jarylys» dep atalady. Jantúrshiktirer ıadro sańyrýqulaǵy aınalasyndaǵy dalany kúıdirip aspanǵa kóterilip barady, aspan bolsa qap-qara, juldyzdar sýyq... Osylaısha Káripbek Kúıikov óziniń sýretshilikke degen qabiletin túsindi.

Káripbek Kúıikovtiń týyndylary Amerıka, Japonııa, Germanııanyń jeke jáne memlekettik kollektsııalaryna qoıylǵan. Onyń kórmeleri Japonııada, AQSh, Germanııa, Túrkııa, Qytaı jáne Qazaqstanda uıymdastyryldy. Káripbektiń kórkem týyndylarynyń basty taqyryby ıadrolyq qarýdyń adamzatqa keltirer qaterimen baılanysty.

Qazaqtan Prezıdenti Nursultan Nazarbaev 2016 jyly ıadrolyq qaýipsizdik jónindegi halyqaralyq samıtte AQSh Prezıdenti Barak Obamamen kezdesken kezinde oǵan K. Kúıikovtyń «Jarylys» degen kartınasyn syıǵa tartqan bolatyn.

Kórmeniń ashylý saltanatyna elimizdiń tanymal saıasat jáne qoǵam qaıratkerleri, Qazaqstan Respýblıkasy Syrtqy ister mınıstriliginiń, halyqaralyq «Nevada-Semeı» qoǵamdyq qozǵalysynyń ókilderi qatysady.

Kórme 2017 jylǵy 9 tamyz kúni saǵat 11.00-de bastalady.