QR Ulttyq mýzeıi rejısserler men operatorlar arasynda ótken baıqaý jeńimpazdaryn marapattaıdy
ASTANA. QazAqparat - QR Ulttyq mýzeıi rejısserler men operatorlar arasynda ótken «Attention! National museum!» («Nazar salyńyzdar! Ulttyq mýzeı!») atty baıqaýdyń jeńimpazdaryn marapattaıdy, dep habarlaıdy QR Ulttyq mýzeıiniń aqparattyq-ımıdjdik qyzmeti.
Sharanyń basty maqsaty - Ulttyq mýzeıdi jáne mýzeı qoryndaǵy tarıhı jádigerlerdi, ult muralaryn, qundy eksponattardy jan-jaqty nasıhattaıtyn beınerolıkter túsirý. Osy arqyly mýzeıdegi mádenı qundylyqtar men tarıhı asyl murany halyqqa keńinen tanystyrý.
Baıqaýǵa jumystardy qabyldaý qazan aıynan bastap eki aı kóleminde júrgizildi. Joba barysynda 20 kásibı jáne áýesqoı shyǵarmashylyq top baq synady. Baıqaý jumystaryna mýzeı dırektory, elimizge tanymal kınorejısserler, mýzeı isiniń bilgirleri, kınotanýshy jáne mádenıettanýshy mamandar tórelik etti. Jeńimpaz atanǵan úzdik jumystar túrli atalym boıynsha qarjylaı jáne baǵaly syılyqtarmen marapattalady.
Sondaı-aq bul keshte otandyq «Nazar-Tekstıl» JShS kilem toqyma fabrıkasy QR Ulttyq mýzeıine arnaıy syı tartý etedi.
Shara aıasynda óner juldyzdary kórermenge kóterińki kóńil-kúı syılaıdy.
