QR Ulttyq mýzeıi Lývrmen jáne Ermıtajben qatar álemniń iri ekspozıtsııalarynyń ondyǵyna enip otyr (FOTO)
ASTANA. QazAqparat - Sáýlettik aýqymy boıynsha jańa Ulttyq mýzeıdiń ǵımaraty álemniń on iri ekspozıtsııasynyń qataryna enip otyr. Bul týraly búgin elorda kúni qarsańynda atalǵan mýzeıdiń resmı ashylý rásimi barysynda Elbasy Nursultan Nazarbaev málim etti.
«Sáýlettik aýqymy boıynsha jańa mýzeıdiń ǵımaraty reseılik Ermıtaj, frantsýzdyq Lývr jáne amerıkalyq «Metropolıten» mýzeıimen qatar álemniń iri ekspozıtsııalarynyń ondyǵyna enip otyr. Alaıda bizge onyń ishin jádigerlermen tolyqtyryp, osy bıikterge qol jetkizýimiz kerek. Bul úlken maqsat», - dedi Prezıdent.
Jalpy aýdany 74 myń sharshy metrden asatyn Ulttyq mýzeıge Qazaqstannyń erte ǵasyrdan búgingi kúnge deıingi arheologııalyq, etnografııalyq jádigerleri men mádenı eskertkishteri jınaqtalǵan. Atap aıtqanda, 14 myń sharshy metr aýmaqta ekspozıtsııalar alańy ornalasqan. Osy oraıda Elbasy ekspozıtsııalardy qurý kezinde osy saladaǵy aldyńǵy qatarly ádisnamalar men Italııa, Japonııa, Reseı jáne Ońtústik Koreıada qoldanylatyn jańa tehnologııalar paıdalanylǵanyn atap ótti.
«Bul jobany júzege asyrǵan sáýletshiler men qurylysshylarǵa erekshe alǵysymdy bildirgim keledi», - dedi Prezıdent. Sonymen qatar Memleket basshysy jumystary bastalǵan mýzeıdiń ujymyna óz quttyqtaýyn jetkizdi.
