QR Ulttyq mýzeıi Eýrazııalyq halyqaralyq kitap kórme-jármeńkesine qatysady
ASTANA. QazAqparat - Qazaqstan Respýblıkasy Ulttyq mýzeıi 2016 jylǵy 9-12 qarasha aralyǵynda Astanadaǵy «Kórme» ortalyǵynda Qazaqstan Táýelsizdiginiń 25 jyldyǵyna oraı uıymdastyrylǵan «Eurasian Book Fair-2016» Eýrazııalyq halyqaralyq kitap kórme-jármeńkesine qatysady, dep habarlaıdy QazAqparat Ulttyq mýzeıdiń baspasóz qyzmetine silteme jasap.
«Eurasian Book Fair-2016» Eýrazııalyq halyqaralyq kitap kórme-jármeńkesi -TMD, Eýropa jáne Azııa elderiniń baspa isi, kitap saýdasy, ǵylymı, bilim berý jáne polıgrafııa kompanııalaryn úlken bir ıntellektýaldy alańǵa biriktiretin eýrazııalyq keńistiktegi eń iri mádenı-aǵartýshy sharalardyń biri.
Búgin saǵat 12-00-de QR Ulttyq mýzeıi janyndaǵy «Halyq qazynasy» ǵylymı-zertteý ınstıtýtynyń «Qazyna» toptamasymen shyǵarǵan alǵashqy kitaptarynyń tanystyrylymy ótedi. Olar: «Ǵasyrlar altyny. Ulttyq mýzeıdiń altyn jáne kúmis buıymdarynyń toptamasy» jáne «Ulttyq mýzeı toptamasyndaǵy qazaqtyń zergerlik óneri» atty túrli-tústi albom-katalogtarmen Qalıolla Ahmetjannyń «Qazaqtyń otty qarýlarynyń tarıhy» kitaby.
Bul serııalyq basylymdardy daıyndaý men basyp shyǵarýdaǵy negizgi maqsat - Qazaqstannyń ejelgi jáne ortaǵasyrlardaǵy tarıhy men mádenıetine qatysty tyń materıaldardy jınaqtaý, ǵylymı taldaý jáne tolyqqandy derek retinde usyný, ǵylymı aınalymǵa engizý.
Kórme-jármeńkede sonymen qatar, jazýshy Jarylqap Beısenbaıulynyń QR Ulttyq mýzeıi ǵylymı-metodıkalyq keńesiniń maquldaýymen jáne QR Mádenıet jáne sport mınıstrligi men Reseı Federatsııasyndaǵy Qazaqstan elshiliginiń qoldaýymen jaryq kórgen «Shoqan Ýálıhanov» atty tarıhı-ǵumyrnamalyq kitabynyń oryssha jańa basylymynyń tanystyrylymy ótkiziledi. Ol shyǵarmanyń alǵashqy basylymynyń tusaýkeseri 2015 jyldyń sońynda Máskeý qalasyndaǵy Orys geografııalyq qoǵamynyń shtab-páterinde ótken bolatyn.
Kórmede sondaı-aq, QR Ulttyq mýzeıiniń Reseı Ǵylym Akademııasy Sibir bólimshisiniń Arheologııa jáne etnografııa ınstıtýtymen birge Shyǵys Qazaqstan oblysynda júrgizilgen arheologııalyq ekspedıtsııa nátıjeleri kórsetiledi. Sol sııaqty Ulttyq mýzeıdiń tól basylymy - «Mádenı mura» jýrnaly jáne Ulttyq mýzeı qorynan sırek kitaptar, biregeı mýzykalyq aspaptar, qanjarlar, qabyrǵa pannosy-plaketkalar, kádesyı buıymdary, qazaqtyń ulttyq zergerlik qolóner áshekeıleri, sııaqty ózge de jádigerler jurtshylyq nazaryna usynylady.
Kórme aıasynda aýqymdy mádenı-iskerlik baǵdarlama - ǵylymı-praktıkalyq konferentsııalar, dóńgelek ústelder, áıgili mádenıet qaıratkerlerimen, aqyn-jazýshylarmen kezdesýler, forýmdar, baıqaýlar, vıktorınalar uıymdastyrylady.
Kórmeni uıymdastyrýshy -«Folıant»baspasy JShS.
Resmı qoldaýshy - QR Mádenıet jáne sport mınıstrligi, Astana qalasy ákimdigi, qoǵamdyq qurylymdar men partııalar.
