QR Ulttyq mýzeıi elimizdiń óńirlerindegi qundy eksponattardy restavratsııalaýǵa kómek kórsetýde
ASTANA. QazAqparat - Ulttyq mýzeıde 300-den astam eksponatqa restavratsııalyq jumystar júrgizildi. Bul týraly búgin Astanada «QazAqparat» agenttigine bergen suhbatynda QR Ulttyq mýzeıi dırektorynyń qor qyzmeti boıynsha orynbasary Abaı Satybaldın málim etti.
«Bıyl biz restavratsııa men konservatsııa boıynsha bólek qyzmetti qurdyq. Qyzmet eki bólimnen turady, ıaǵnı onda restavratsııa men konservatsııa bólimi jáne konservatsııa men restavratsııanyń zerthanasy jasaqtaldy. Atap aıtqanda, restavratsııa men konservatsııa bólimi tórt sektordan qalyptasqan. Birinshisinde aǵash, teri, súıek jáne metall buıymdardyń restavratsııasy júrgiziledi. Ekinshisi, kórkem sýret, grafıka jáne qaǵaz restavratsııasy baǵytynda jumys isteıdi. Kelesi sektor kilem men kıiz buıymdardy qamtysa, tórtinshi sektor farfor, shyny jáne ózge de keramıkalyq zattarǵa restavratsııalaýdy júrgizedi», - dedi A.Satybaldın. Onyń sózine qaraǵanda, atalǵan qyzmet ashylǵaly restavratorlar 300-den astam eksponatty jańǵyrtty. Bular mýzeıdiń qorlary men ekspozıtsııada saqtalyp júrgen eksponattar. Tıisti saraptamalyq jumystar júrgizilgennen keıin, eksponattar restavratsııalyq qyzmetke jiberiledi. «Sonymen qatar biz óńirlerden kelgen murajaılardyń kórmelerin ótkizemiz. Atap aıtqanda, óńirlerdegi murajaılardyń eksponattary da restavratsııalaýdy qajet etedi. Osy múmkindikti paıdalanyp, olar Ulttyq mýzeıde eksponattaryn jańǵyrta alady», - dedi A.Satybaldın.
