QR Ulttyq mýzeıi Botaı qonysyna alǵashqy dala zertteýin júrgizdi (FOTO)
ASTANA. QazAqparat - QR Ulttyq mýzeıi ǵylymı qyzmetkerleriniń eneolıt dáýiriniń biregeı eskertkishi - Botaı qonysyna zertteý jumystary jalǵasýda. Jas zertteýshiler Botaı qonysyndaǵy arheologııa jumystaryna belsendi aralasty, dep habarlady QR Ulttyq mýzeıiniń baspasóz qyzmetinen.
Jas ǵalymdar mádenı qabattardy ashý, artefakttarǵa turpattamalyq jáne statıstıkalyq saraptama júrgizýdiń kúrdeli ádisterin meńgerdi. Atalǵan ekspedıtsııa qazba jumystaryn júrgizýdiń tájirbıelik daǵdylaryn meńgerýdi ǵana emes, sonymen qatar zertteýshilerdiń jeke ǵylymı jumys taqyryptaryn bekitý men otandyq ǵylymnyń damýyna úles qosýdy maqsat etti. «Ulttyq mýzeı alǵashqy ǵylymı zertteý jumystary úshin Botaı qonysyn tańdap alýy kezdeısoqtyq emes. Dástúrli qazaq qoǵamynyń kóshpeli ómir saltymen ómir súrgeni, onyń tirshilik áreketi dala keńistigimen baılanysty bolǵany belgili. Botaılyqtar dalany ıgerýdiń bastamasy retinde jylqyny úıretip, mingen. Sodan jylqyny kólik quraly retinde paıdalanǵan jańa dáýir qalyptasqan. Qazaqtardyń mádenıetiniń paıda bolý úderisi men Eýrazııalyq dala órkenıetiniń qalyptasýy osy botaılyqtardan bastaý alady. Botaı mádenıeti Qazaqstan tarıhy úshin mańyzdy brendterdiń biri bolyp otyr, ári Ulttyq mýzeıdiń ekspozıtsııalarynyń arasynan laıyqty ornyn alǵan», - dedi QR Ulttyq mýzeıi ǵylymı jumystar boıynsha dırektor orynbasary Oljas Sharızdanov. Aıta keteıik, QR Ulttyq mýzeıiniń ǵylymı qyzmetkerleri 1 tamyzda Soltústik Qazaqstan oblysyna eneolıt dáýiriniń biregeı eskertkishi - Botaı qonysyna zertteý jumystaryn júrgizý úshin arheologııalyq ekspedıtsııaǵa shyqqan bolatyn. Qyzmetkerler úshin t.ǵ.d., arheologııa professory, Vıktor ZAIBERT Botaı eneolıt qonysyna júrgiziletin qazba jumystarynyń ádisteri boıynsha sheberlik-synybyn júrgizip jatyr, delingen habarlamada.
