QR Ulttyq murajaıynyń zertteýshileri úlken oljaǵa keneldi (FOTO)
ASTANA. QazAqparat - Eki aptadan beri QR Ulttyq murajaıynyń ǵylymı qyzmetkerleri Soltústik Qazaqstandaǵy Botaı qonysyn zerttedi. Osy ýaqyt aralyǵynda zertteýshiler ekijaqty óńdelgen, shaqpaqtastan jasalǵan pyshaq, tegistelip jyltyratylǵan tas balta, naızanyń ushy, saby qysqa naızanyń sadaǵyn tapqan.
Olja kóshpeli qazaq jerinde qural-saımandar men qarý-jaraqtyń paıdalanylǵandyǵynyń klassıkalyq úlgisi. Bul týraly astana.kz saıtyna QR Ulttyq murajaıynan habarlady.
Sondaı-aq, qazba jumystary barysynda attyń súıekteri, botaılyqtardyń eńbek quraldary, kúndelikti turmysta qoldanǵan zattary, tabynǵan buıymdary tabylǵan. Sonymen qatar zertteý barysynda qonystanǵan jerge jaqyn 2 jerleý qurylysy anyqtaldy.
Botaı mádenıeti kelesi dáýirdegi mádenıettiń damýyna úlken yqpal etti. Tabylǵan buıymdar men nysandar Qazaqstannyń biregeı aımaǵynyń tarıhy men mádenıetine jańa, tyń aqparattar qosatyn boldy.
Eske sala keteıik, 1 tamyzda QR Ulttyń murajaıynyń ǵylymı qyzmetkerleri tarıhta alǵash ret arheologııalyq ekspedıtsııaǵa shyqqan edi. Zertteý nysany bolyp eneolıt dáýirinen qalǵan Botaı qonysyndaǵy eskertkish tańdalǵan. Bul sapar QR Ulttyq murajaıynyń ǵylymı-zertteý jumystarynyń bastaýy boldy. Sonymen qatar tarıh pen mádenıetimizdegi eskertkishti zerttep qana qoımaı, Qazaqstan tarıhy men arheologııasyndaǵy ǵylymı qyzmetkerlerdiń biliktiligin jetildirýge de múmkindik beredi.
