QR Ulttyq muraǵatynyń qujattardy saqtaý múmkindigi 1 mıllıon birlikti quraıdy
ASTANA. Qyrkúıektiń 16-sy. QazAqparat /Marlan Jıembaı/ - Qazaqstan Respýblıkasynyń Ulttyq muraǵatynda uıymnyń vedomstvolyq muraǵatynda barlyq tasymaldaý túrlerindegi qujattardy esepke alý,
saqtaý jáne olardy memlekettik saqtaýǵa berý máselelerine arnalǵan respýblıkalyq tájirıbelik semınar ótti, dep habarlaıdy QazAqparat.
Basqosýdaǵy maqsat - Ulttyq muraǵatty jınaqtaýǵa baılanysty ádistemelik kómek kórsetý jáne osy oraıda kezdesip otyrǵan problemalardy ortaǵa salý. Atalmysh keńeske memlekettik organdar muraǵattarynyń is júrgizýdi uıymdastyrýǵa jaýapty qyzmetkerleri qatysty.
«Ulttyq muraǵattyń qurylyp, óz qyzmetin bastaǵanyna taıaý arada 3 jyl tolady. Osy ýaqyt aralyǵynda biz muraǵattyń ishki jumystaryn retke keltirdik. Biraz tabystarǵa da qol jetkizdik, kemshilikter de bar, sharttarymyzdyń oryndalmaı qalatyn kezderi de bolady», deıdi Ulttyq muraǵattyń bas dırektory Yrysty Sarıeva.
Ulttyq muraǵat bas dırektorynyń orynbasary Tursyngúl Qusaıynovanyń aıtýyna qaraǵanda, mekeme osy ýaqyt aralyǵynda memlekettik saqtaýǵa basqarý qujattarynyń - 74, jeke sıpattaǵy qujattardyń - 4, ǵylymı-tehnıkalyq qujattardyń - 1 qoryn alǵan. Qazir mundaǵy jalpy qujattardyń sany 59082 birlikti quraıdy. Jalpy muraǵattyń qujattardy saqtaý múmkindigi 1 mıllıon birlikke jetedi.
«Qazirgi ýaqytta tólqujattandyrý jumystary júrgizilip jatyr. Bul shara vedomstvonyń saqtaýyndaǵy qujattardy esepke alý úshin qajet», deıdi T.Qusaıynova.
