QR Ulttyq kompanııalarynyń tabysy ekinshi jartyjyldyqta eki esege qysqardy
ASTANA. QazAqparat - Qazaqstanda ulttyq kompanııalardyń 2017 jyldyń sáýir-maýsym aralyǵyndaǵy jalpy tabysy 67,2 mlrd teńgeni qurady, bul qańtar-naýryz aralyǵyndaǵy kórsetkishten (131,6 mlrd teńge) 1,96 esege az, dep habarlaıdy «QazAqparat» HAA tilshisi finprom.kz saıtyna silteme jasap.
Osy jyldyń ekinshi toqsanynda ulttyq kompanııalar 555,3 mlrd teńge paıda tapqan, bul 2016 jyldyń atalmysh kezeńimen salystyrǵanda, 3,7%-ǵa kóp. Sonymen qatar, kásiporyn qyzmeti barysynda shyǵyn kólemi 488,1 mlrd teńgege jetip, ótken jylǵy kórsetkishten 11,3%-ǵa artqan.
Sondaı-aq, tabys kórsetkishiniń qurylymy kórsetkendeı, kiristerdiń ósýi ulttyq kompanııalardyń negizgi ónimderi men qyzmetterin satýdan emes, qarjylyq qyzmet boıynsha, onyń ishinde banktik salymdar boıynsha syıaqy kólemine baılanysty bolyp otyr.
Atap aıtqanda, eseptik kezeńdegi taýarlar men qyzmet kórsetýlerden túsken paıda 2016 jyldyń sáýir-maýsym aralyǵyndaǵy kórsetkishtermen salystyrǵanda 22,1%-ǵa nemese 87,4 mlrd teńgege azaıǵan, al qarjylandyrýdan túsken tabys - 2,2 esege nemese 111 mlrd teńgege artqan.
