QR Ulttyq kásipkerler palatasy janyndaǵy Kásipkerler quqyǵyn qorǵaý jónindegi keńestiń І otyrysy ótedi
ASTANA. 25 qarasha. QazAqparat - Erteń Qazaqstan Respýblıkasynyń Ulttyq kásipkerler palatasy janyndaǵy Kásipkerler quqyǵyn qorǵaý jónindegi keńestiń birinshi otyrysy ótedi, dep habarlaıdy atalǵan vedomstvonyń baspasóz qyzmetinen.
Kásipkerler quqyǵyn qorǵaý jónindegi keńes QR UKP konsýltatıvti-keńesýshi organy, kásipkerlik sýbektileriniń zańdy quqyqtary men múddelerin qorǵaý máseleleri boıynsha tıimdi jáne júıeli sheshimder qabyldaý jáne bıznesti damytýdaǵy kúrdeli máselelerdi kópshilik aldynda aıqyndaý maqsatynda osy jyldyń qarasha aıynda qurylǵan.
Keńes Tóraǵasy Ǵanı Qasymov - Ulttyq kásipkerler palatasynyń QR Parlament Senatyndaǵy ókili. Keńes quramy Parlament Senaty men Májilis depýtattary, Bas prokýratýra, Ádilet mınıstrligi, Qarjy polıtsııasy, Memlekettik qyzmet isteri jónindegi agenttik qurylymdarynyń basshylarynan, sondaı-aq ǵalym-quqyqtanýshylar, advokattyq is, bıznes-qoǵamdastyq jáne BAQ ókilderinen quralǵan.
Keńestiń birinshi otyrysy jalpy máselelerdi qarastyrýdan bastaıdy, atap aıtqanda: Keńes quramy men jumys reglamentimen tanystyrý, Qazaqstan Respýblıkasynyń Qylmystyq-protsessýaldyq kodeksi jáne Qylmystyq kodekstiń jańa redaktsııasy jobasyn talqylaý.
Keńes otyrysynyń kún tártibine QR Ulttyq kásipkerler palatasy ókilderiniń kásipkerlik sýbektileriniń múddeleri men quqyqtaryna qysym jasalýmen baılanysty naqty oqıǵalar keltirilgen baıandamalaryn tyńdaý qoıylǵan. Palata sarapshylary bıznesmenderdiń hattarymen aldyn ala tanysyp, atalǵan máseleler boıynsha zańdy qoldaý kórsetý sharalaryn qabyldaǵan.
Otyrys qorytyndysy boıynsha QPK jáne QK jobasyna qatysty, sondaı-aq bıznes ókilderiniń hattary boıynsha Keńes usynystar jasap, usynystardy tıisti memlekettik organdarǵa jiberetin bolady.
