QR Ulttyq ǵylym akademııasynda saılaý osyndaı keń kólemde sońǵy 17 jylda alǵash ret ótip otyr - Murat Jurynov
ALMATY. 22 maýsym. QazAqparat - Endi QR UǴA akademıgi dárejesin alý úshin aldymen korrespondent-múshe satysynan ótý qajet bolady.
Bul týraly búgin Almatyda ótip jatqan QR Ulttyq ǵylym akademııasynyń kezekti jalpy jınalysynda aıtyldy.
QR UǴA prezıdenti Murat Jurynovtyń aıtýynsha, osyndaı keń kólemdegi saılaýdyń ótpeýine onyń 1996 jyldan keıin óz ataýyn 3 ret ózgertýi túrtki bolǵan. Elbasy 2011 jyly 1 jeltoqsanda ótken Qazaqstan ǵalymdarynyń forýmyndaǵy sóılegen sózinde ǵalymdar qataryn jańa kadrlarmen tolyqtyryp, tyń sheshimder qabyldaýǵa mindettedi. QR UǴA korrespondent-músheligine ótýge úmitkerlerden saraptamadan ótken 76 ótinish qabyldandy.
Akademık M. Jurynovtyń sózine qaraǵanda, ǵylymnyń iri salalary boıynsha QR UǴA 6 bólimshelerinde UǴA korrespondent-músheligine kandıdattardy saılaý ótti. Fızıka, matematıka, ınformatıka bólimshesi boıynsha 8 orynǵa 11 úmitkerdiń altaýy, akademıkterden 3/2-den artyq daýys alyp saılandy. 7 orynǵa Hımııa jáne tehnologııalar bólimshelerinde 12 úmitkerdiń jeteýi, Jer týraly ǵylymdar bólimshesinde 7 úmitkerdiń tórteýi, Agrarlyq ǵylymdar bólimshesinde 8 úmitkerdiń altaýy, Bıologııa jáne medıtsına bólimshesinde 10 úmitkerdiń tórteýi kópshilik daýysyn ıelendi. Al Qoǵamdyq jáne gýmanıtarlyq ǵylymdar bólimshesi boıynsha 10 orynǵa 7 bos oryn qosylyp, 28 úmitkerdiń 17-si saılandy. Jalpy baıqaý jarııalanǵan 46 orynǵa 44 úmitker-kandıdattar saılandy, al 2 oryn bos qaldy. Endi búgin daýys berý arqyly kandıdattar múshe-korrespondent bop qabyldanbaq.
