QR Ulttyq Bankiniń jalpy halyqaralyq rezervteri ósti
ALMATY. QazAqparat- 2016 jylǵy maýsymda QR Ulttyq Bankiniń jalpy halyqaralyq rezervteri 1 891,0 mln. dollarǵa nemese 6,6 paıyzǵa ósti. Bul rette shetel valıýtasyndaǵy aktıvter 937,2 mln. dollarǵa, sondaı-aq, baǵasynyń 8,8 paıyzǵa ósýi kezinde júrgizilgen operatsııalar nátıjesinde altyndaǵy aktıvter 953,8 mln. dollarǵa ulǵaıdy, - dep atap ótilgen QR UB-nyń «Qarjy naryǵyndaǵy ahýal týraly» jarııalanǵan baspasóz relızinde.
Ulttyq Bankte túsindirgendeı, halyqaralyq rezervterdiń negizgi ósimi Úkimettiń Ulttyq Banktegi shottaryna valıýtalardyń túsýi, altyndaǵy aktıvterdi qaıta baǵalaý, sondaı-aq bankterdiń shetel valıýtasyndaǵy korrespondenttik shottaryndaǵy qaldyqtardyń ulǵaıýy esebinen bolyp otyr.
«Bekitilgen grafıkke sáıkes, banktermen valıýtalyq-paıyzdyq svop operatsııalary óteldi. Ulttyq qordyń aktıvterin tolyqtyrý jáne Úkimettiń syrtqy boryshyna qyzmet kórsetý operatsııalary júrgizildi», - delingen qarjy retteýshisiniń resmı habarynda.
Onda Ulttyq qordyń shetel valıýtasyndaǵy aktıvterin (jedel derekter boıynsha 65 748,5 mln. dollar) qosa alǵanda, tutastaı alǵanda eldiń halyqaralyq rezervteri bir aıda 2,3%-ǵa ósip, 96 242,8 mln. dollardy quraǵandyǵy atap ótilgen.
QR UB derekteri boıynsha, aqsha bazasy 2016 jylǵy maýsymda 8,9 paıyzǵa nemese 399,0 mlrd. teńgege keńeıdi. Tar aqsha bazasy, ıaǵnı ekinshi deńgeıdegi bankterdiń Ulttyq Banktegi merzimdi depozıtterin eseptemegendegi aqsha bazasy 4,3 paıyzǵa keńeıdi (jyl basynan beri 8,2%-ǵa tarylý). 2016 jylǵy maýsymda aqsha massasy 18 398,9 mlrd. teńgege deıin 2,3%-ǵa (jyl basynan beri 6,9%-ǵa ósti), aınalystaǵy qolma-qol aqsha 1 582,3 mlrd. teńgege deıin 6,5%-ǵa (jyl basynan beri 27,9%-ǵa), bank júıesindegi depozıtter kólemi 16 816,6 mlrd. teńgege deıin 1,9%-ǵa (jyl basynan beri 5,3%-ǵa ósti) ulǵaıdy. Aqsha massasynyń qurylymynda depozıtterdiń úlesi 2016 jylǵy mamyrdaǵy 91,7%-dan 2016 jylǵy maýsymda 91,4%-ǵa deıin azdap qysqardy (2015 jylǵy jeltoqsanda - 92,8%), dep habarlanady aqpar hatta.
