QR Ulttyq Bankiniń «Kúltegin» eskertkish banknoty jyldyń eń úzdigi atandy
ALMATY. QazAqparat - QR Ulttyq Bankiniń nomınaly 1000 teńgelik «Kúltegin» eskertkish banknoty jyldyń eń úzdik banknoty ataǵyn aldy
Mamyrda Halyqaralyq banknot qoǵamdastyǵy (International Bank Note Society) túrki jazba eskertkishine arnalǵan, nomınaly 1 000 teńgelik «Kúltegin» eskertkish banknotyn «2013 jylǵy eń úzdik banknot» dep tanydy.
Búkil álemniń banknot kollektsıonerleriniń táýelsiz birlestigi bolyp tabylatyn Halyqaralyq banknot qoǵamdastyǵy jyl saıyn ınternet-daýys berý arqyly jyldyń eń úzdik banknotyn tańdaıdy. Bul kommertsııalyq emes uıymnyń negizi 1961 jyly qalanǵan jáne búgingi kúni onyń álemniń 90 elinen 2 000 astam múshesi bar.
Halyqaralyq banknot qoǵamdastyǵy alǵashqy «2011 jylǵy eń úzdik banknot» ataǵyn 2012 jyly Qazaqstan Respýblıkasy Táýelsizdiginiń 20 jyldyǵyna arnalǵan nomınaly 10 000 teńgelik eskertkish banknotyna bergen bolatyn. Kelesi jyly da Qazaqstan Respýblıkasynyń Ulttyq Bankiniń «Qazaq Eli» serııasynan nomınaly 5 000 teńgelik banknoty ekinshi «2012 jylǵy eń úzdik banknot» ataǵyn ıelendi.
«Túrki jazba eskertkishine arnalǵan, nomınaly 1 000 teńgelik «Kúltegin» eskertkish banknotyna berilgen úshinshi «2013 jylǵy eń úzdik banknot» ataǵy táýelsiz Qazaqstan jylnamasyndaǵy tarıhı mańyzdy sát bolyp tabylady. Sebebi osy kezge deıin birde-bir eldiń ulttyq valıýtasy úsh marapat alyp kórgen emes», - delingen habarlamada.
Syılyqty alýǵa 12 eldiń banknoty: AQSh-tyń 100 dollary, 5 eýro banknoty, Reseıdiń Sochı olımpıadasyna arnalǵan eskertkish 100 rýbldik banknoty úmitker boldy.
