QR Ulttyq bankiniń «Ǵarysh» toptamasy jańa monetalarmen tolyqty
ALMATY. 18 qazan. QazAqparat - Búgin QR Ulttyq banki «Ǵarysh» monetalar serııasynan 500 jáne 50 teńgelik eki «HǴS» eskertkish monetalaryn aınalysqa shyǵardy.
Sheńber pishindes qos monetanyń da bet jáne syrt jaǵynda beıneler men jazýlar bederlengen. Syrt jaǵynyń ortasynda jer mańy orbıtasyndaǵy Halyqaralyq ǵarysh stantsııasynyń (HǴS) beınesi ornalasqan jáne soǵylǵan jylyn bildiretin «2013» dep jazylǵan. Joǵarǵy bóliginde - HǴS emblemasy. Aınaldyra memlekettik tilde «HǴS», orys tilinde «MKS» jáne aǵylshyn tilinde «INTERNATIONAL SPACE STATION» degen jazýlar bar.
500 teńgelik bıkolorly (quramdas) monetabirine biri ornalasqan saqınadan jáne dıskiden turady. Monetanyń ishki dıski tantaldan, syrtqy saqınasy kúmisten jasalyp, beıne jyltyr betke ornalastyrylǵan. Bet jaǵynyń ortasynda adamzat pen jahannyń birligin, ótken men búginginiń baılanysyn bildiretin kompozıtsııa beınelengen. Oń jaǵynda «500 TEŃGE» degen monetanyń nomınaly bar. Nomınaldyń astynda Qazaqstan teńge saraıynyń taýar belgisi jáne moneta daıyndalǵan metaldy, onyń synamyn jáne salmaǵyn bildiretin «Ag 925 14,6g», «Ta 26,8g» degen jazý eki qatar etip jazylǵan. Aınaldyra memlekettik jáne aǵylshyn tilderinde «QAZAQSTAN RESPÝBLIKASY» degen jazý. Al neızılber qospasynan jasalǵan eskertkish monetanyń bet jaǵynyń ortasynda adamzat pen jahannyń birligin, ótken men búginginiń baılanysyn bildiretin kompozıtsııa beınelengen. Oń jaǵynda «50 TEŃGE» degen monetanyń nomınaly bar. Sondaı-aq bıkolorly moneta saqınasynyń synamy 925/1000, salmaǵy 14,6 gramm kúmisten, dıski salmaǵy 26,8 gramm tantaldan jasalǵan, dıametri - 38,61 mm., «proof» sapasymen daıyndalǵan, taralymy - 5 myń dana, qyry bederli. Al «neızılber» qospasynan jasalǵan monetanyń dıametri - 31 mm., massasy - 11,17 gramm, taralymy - 100 myń dana, qyry bederli.
