QR Ulttyq bankiniń Facebook jáne Twitter áleýmettik jelilerinde jeke paraqshasy ashyldy
ALMATY. QazAqparat - QR Ulttyq bankiniń Facebook jáne Twitter áleýmettik jelilerinde jeke paraqshasy ashyldy. Bul týraly búgin bazalyq mólsherleme boıynsha ótken brıfıng barysynda QR Ulttyq bankiniń tóraǵasy Danııar Aqyshev málim etti.
«Búgin QR Ulttyq bankiniń Facebook jáne Twitter áleýmettik jelilerinde resmı akkaýnty iske qosyldy. Endi solar arqyly jańalyqtarymyzdy, qabyldanǵan sheshimder men ótkizilip jatqan sharalar týraly der kezinde habarlap otyratyn bolamyz», - dedi D. Aqyshev.
Sonymen qatar, onyń aıtýynsha, endi jańa aqparattyq saıasat aıasynda Ulttyq bank turǵyndarmen, buqaralyq aqparat quraldarymen jáne qarjy naryǵymen aradaǵy baılanysty nyǵaıta túsetindigin jetkizdi.
«Ulttyq bank barlyq nysanaly aýdıtorııamen aradaǵy kommýnıkatsııany nyǵaıtýǵa múddeli jáne bolashaqta óziniń qyzmeti týraly aqparat berýdiń jańa túrlerin engizetin bolady», - dedi QR Ulttyq bankiniń basshysy.
Aıta ketelik, búgin QR UB óziniń ınternet-saıtynda bazalyq mólsherlemeniń 15 paıyzdan 13 paıyzǵa deıin túskendigi týraly aqparat jarııalady.
Bazalyq mólsherleme týraly kelesi sheshim 2016 jyldyń 15 tamyzy kúni keshki saǵat 17:00-de jarııalanatyn bolady.
