QR Ulttyq bankiniń basshysy krıptovalıýtaǵa qatysty pikir bildirdi

ASTANA. QazAqparat - QR Ulttyq bankiniń bashysy Danııar Aqyshev baspasóz jáne televızııalyq BAQ redaktorlarymen bolǵan kezdesýinde krıptovalıýtany paıdalanýǵa qatysty pikirin bildirdi, dep habarlaıdy QazAqparat Ulttyq banktiń baspasóz málimetterine silteme jasaı otyryp.

Kezdesý barysynda bank basshysy bir jarym saǵat boıyna buqaralyq aqparat quraldary ókilderiniń saýaldaryna jaýap berdi. Saýaldardyń biri krıptovalıýtaǵa qatysty boldy. 

D.Aqyshev sózinde krıptovalıýtany retteý nemese ony shekteýge qatysty másele qosymsha zertteýdi qajet etetindigin aıtty.

«Ulttyq bankte krıptovalıýtany zertteýmen birneshe departament aınalysyp jatyr. Ázirge qazir bul naryqta bolyp jatqan protsesterge qatysty qandaı da bir tolyqqandy málimet berýge erte. Bul jerde biz qazir belsendi oıynshydan kóri baıqaýshy rólindemiz»,-dedi ol.

Sonymen qatar, bank basshysy qarjy retteýshinisiń mundaı kózqarasy nemen baılanysty ekenin túsindirip berdi.

«Birinshi kezekte túsinip alý qajet másele - krıptovalıýta álemde bar nárse, osyǵan qaraı ony shekteý sharasyn qoldaný úshin ony ákimshilendirý tetigi bar ma degen máselege kóz jetkizip alý qajet. Eger Siz shetelde júrip qarjy pıramıdasynyń qatysýshysy bola qalsańyz, QR Ulttyq banki bul jaǵdaıǵa yqpal ete almaıdy. Al, Qazaqstanda biz bul máseleni ákimshilendire alamyz»,-dedi D.Aqyshev.

Ol óziniń sózinde Ulttyq banktiń osy kezde retteý tetigi men qarjy retteýshisiniń múmkindikteri turǵysynda zertteý jumystaryn júrgizip jatqandyǵyn atap ótti.

«Menińshe, qandaı da bir shekteýlersiz qarjyny álemniń kez kelgen jerine aýdarýǵa múmkindik beretin ashyq valıýta erkindigi jaǵdaıynda turǵyndar krıptovalıýtany qazaqstandyq naryqta emes, kórshiles elderdiń aımaǵynan satyp alýy yqtımal. Osyǵan qaraı bul protsesti retteý óte kúrdeli bolady»,-dedi ol.

Sóz sońynda D.Aqyshev turǵyndardyń ortalyq bankter tarapynan kóteriletin máselelerdi durys túsine bermeıtindigine ókinish bildirdi.

«Jalpy alǵanda qandaı da bir eldiń krıptovalıýtany moıyndaǵandyǵy týraly jıi estip júrmiz. Menińshe, bul áńgime jekelegen retteý tetigi bar nemese krıptovalıýtany tar quqyqtyq sheńberde qoldanýy múmkin jaǵdaılarǵa qatysty bolyp otyr. Mysaly ony bilikti mamandary bar naqty bir toptar eldiń ishindegi naqty bir másele boıynsha qoldanýy múmkin. Sondaı-aq krıptovalıýtaǵa tiksine qaraıtyn elder de bar, olar árıne oǵan shekteý qoıady. Bul másele boıynsha ázirge naqty bir standart joq»,-dedi QR Ulttyq bank basshysy.