QR Ulttyq bankiniń altyn-valıýta rezervteri jyl basynan beri 4,9 paıyzǵa artyp, 30,5 mlrd. dollardy qurady
ALMATY. QazAqparat - Bıyl QR Ulttyq bankiniń altyn-valıýta rezervteri men Ulttyq qordyń aktıvteri jyl basynan beri ósýin jalǵastyrýda. Bul týraly búgin QR Úkimetiniń otyrysynda jasaǵan baıandamasynda QR Ulttyq banki tóraǵasynyń orynbasary Ǵalymjan Pirmatov málim etti.
Onyń aıtýynsha, altyn-valıýta rezervteri jyl basynan beri 9,4 paıyzǵa ósip, 30,5 mlrd. AQSh dollaryn quraǵan. Al bul, sońǵy 4 jyl ishindegi eń joǵary kórsetkish. Al, Ulttyq qordyń aktıvteriniń kólemi - 65,7 mlrd. AQSh dollaryna jetti.
«Qazaqstannyń halyqaralyq rezervteri 96,2 mlrd. AQSh dollaryna jetti. Jyl basynan bergi ósim - 5,3 paıyzdy qurady», - dedi Ǵ. Pirmatov.
Sonymen qatar, QR Ulttyq banki tóraǵasynyń orynbasary teńge salymdary boıynsha 2016 jyldyń birinshi jartyjyldyǵyndaǵy derekterdi keltirdi, - dep habarlaıdy QR Ulttyq bankiniń baspasóz qyzmeti.
«Sonymen, ınflıatsııaǵa jáne aıyrbastaý baǵamyna qatysty jaǵymdy kútýlerdiń kúsheıýi bank júıesindegi depozıtterdiń ósýine yqpal etip otyr. 2016 jyldyń alǵashqy 6 aıynda ol 5,3 paıyzdy (846,2 mlrd. teńge) qurap, 16,8 trln. teńgege deıin ósti.
QR Ulttyq valıýtaǵa degen senimdi qaıtarý jóninde qabyldanǵan sharalar nátıjesinde halyq ulttyq valıýtaǵa basymdyq bere bastady. Depozıtterdiń dollarlanýy tómendedi», - dedi Ǵ. Pirmatov.
Ol osyny rastaıtyn derekterdi keltirdi. Máselen, shetel valıýtasyndaǵy depozıtterdiń úlesi 2016 jylǵy qańtardaǵy óziniń eń joǵary máni - 69,9 paıyzdan 2016 jylǵy maýsymnyń qorytyndysy boıynsha - 57,6 paıyzǵa deıin tómendedi. Jeke tulǵalardyń depozıtteri boıynsha dollarlandyrýdyń deńgeıi 67,5 paıyzǵa deıin tómendedi (2016 jylǵy qańtarda - 80,41%). Al, zańdy tulǵalardyń depozıtteri boıynsha teńgedegi jáne valıýtadaǵy depozıtter bólikteri arasynda parıtet baıqalady (tıisinshe 49,5% jáne 50,5%).
«Teńgedegi salymdardyń úlesin odan ári ulǵaıtý kózdelip otyr. Al bul, ekonomıkany nesıelendirýdiń belsendiligin arttyrý úshin qajetti bankterdi teńgemen qorlandyrýdy qamtamasyz etedi», - dep atap ótti QR UB basshysynyń orynbasary.
Sonymen qatar, Ǵ. Pirmatov óz baıandamasynda ekonomıkaǵa kredıtter kólemi jyldyń basynan bastap is júzinde ózgermegenin jáne 2016 jylǵy maýsymnyń sońynda 12,5 trln. teńge bolǵanyn jetkizdi.
«Shaǵyn bıznesti nesıelendirý memlekettik qoldaý esebinen - 2,7 trln. teńgege deıin, ıaǵnı 32 paıyzǵa ósti. Kredıtteý qarqynynyń aıtarlyqtaı óskenin aýyl sharýashylyǵy (8,6%-ǵa) men qurylys (2,7%-ǵa) salalarynan baıqaýǵa bolady», - dep qorytyndylady Ǵ. Pirmatov.
