QR Ulttyq bankine saqtandyrý naryǵynda básekelestikti qamtamasyz jóninde tıisti nusqaý berildi
ALMATY. QazAqparat - QR Ulttyq ekonomıka mınıstrligi Tabıǵı monopolııalardy retteý jáne básekelestikti qorǵaý komıteti (monopolııaǵa qarsy organ) saqtandyrý qyzmeti salasyndaǵy zańnamalyq aktilerdi tekserý nátıjeleri boıynsha avtokólik quraldary ıeleriniń azamattyq-quqyqtyq jaýapkershiligin saqtandyrý qyzmetteri naryǵynda básekelestikti shekteıtin normalardyń bar ekendigin anyqtady.
Mysaly, 2016 jylǵy 1 qańtarynan bastap, «Kólik quraldary ıeleriniń azamattyq-quqyqtyq jaýapkershiligin mindetti saqtandyrý týraly» QR Zańyna engizilgen ózgerister kúshine endi. Soǵan sáıkes, endi jol-kólik oqıǵasy bolǵan jaǵdaıda, keltirilgen zalaldy baǵalaý jumystaryn saqtandyrý kompanııalarynyń ózderi júrgizetin bolady. Al buǵan deıin, ıaǵnı ózgerister engizilgenge deıin, jol-kólik apatynan keıingi kólik quraldarynyń zalalyn baǵalaýdy baǵalaýshylar - táýelsiz sarapshylar, jeke jáne zańdy tulǵalar júrgizip kelgen bolatyn.
Al endi, atalmysh zańǵa ózgerister engizilgen soń, saqtandyrý uıymdary Ulttyq bank basqarmasynyń 2016 jylǵy 28 qańtardaǵy qaýlysymen qabyldanǵan normatıvtik quqyqtyq aktisi (kólik quralyna keltirilgen zalal mólsherin anyqtaý qaǵıdasy) negizinde kólik quralyna keltirilgen zalaldy baǵalaýdy ózderi júzege asyryp jatyr. Sonymen qatar, osy zań boıynsha avtokólik ıeleri saqtandyrý uıymdarynyń baǵalaý mólsherine kóńilderi tolmaǵan jaǵdaıda ǵana zańdy tulǵalarǵa júgine alý quqyǵyna ıe. Al jeke tulǵalardyń qyzmetine osy qoldanystaǵy zańmen múldem tyıym salyndy.
Mine, osylaısha, jol-kólik oqıǵasynan keıin keltirilgen zııandy baǵalaý naryǵynda básekelestiktiń shektelgendigi anyqtaldy. Al baǵalaýshy jeke tulǵalarǵa júginý endi tipti múmkin bolmaı qaldy.
Osyǵan baılanysty, monopolııaǵa qarsy organ básekelestikti qamtamasyz etý maqsatynda QR Ulttyq bankine atalmysh zańnyń, jol-kólik apatynan keıingi kólikke keltirilgen zalaldy baǵalaý naryǵyndaǵy básekelestikti shekteıtin normalaryna qajetti ózgerister engizý týraly tıisti nusqaý berdi.
Aıta ketelik, Ulttyq banktiń resmı málimetine sáıkes, jol-kólik oqıǵasynan keıin kólik quralyna keltirilgen zııandy baǵalaý boıynsha akkredıtatsııaǵa ázirge elimiz boıynsha 319 táýelsiz sarapshy ıe bolǵan (olardyń ishinde zańdy tulǵalardyń sany - 212, jeke tulǵalar - 107.
