QR Ulttyq banki ulttyq valıýtada ashylǵan depozıtterdiń mólsherlemesin ósirýi múmkin
ALMATY. QazAqparat - QR Ulttyq banki ulttyq valıýta - teńgemen ashylǵan depozıtterdiń jyldyq mólsherlemesin ósirýi múmkin. Bul týraly búgin Almatyda ótken baspasóz máslıhaty barysynda QR Ulttyq bankiniń tóraǵasy Danııar Aqyshev málim etti.
«Meniń ustanymym bylaı - jeke tulǵalardyń depozıtteri boıynsha belgilenetin mólsherlemeler makroekonomıkalyq irgeli faktorlarǵa negizdelýi tıis. Qazir negizgi faktor - ol ınflıatsııa. Al onyń kólemi dál qazir 12,8 paıyzdy qurap otyr», - dedi ol.
Bas bankırdiń aıtýynsha, búgingi tańda teńgemen ashylǵan depozıtter boıynsha jyldyq mólsherlemeni kóteretin ýaqyt jetti. Qazir bul másele talqylanyp jatyr. Aldaǵy bir aı ishinde naqty sheshim shyǵarylady.
Odan basqa, QR Ulttyq bankiniń tóraǵasy sheteldik valıýtada ashylǵan depozıtter boıynsha da jyldyq mólsherlemeni arttyrý máselesi talqylanyp jatqandyǵyn jetkizdi.
