QR Ulttyq banki «tólem júıesiniń» túsinigin zańnamalyq turǵyda reglamenttemek
ASTANA. QazAqparat - QR Ulttyq banki «tólem júıesiniń» túsinigin zańnamalyq turǵyda reglamentteýdi josparlap otyr. Bul týraly Ulttyq banktiń Tólem júıeleri departamenti dırektorynyń orynbasary Erlan Ashyqbekov málim etti.
Sonymen qatar ol «Tólemder jáne tólem júıeleri týraly» zań jobasynyń negizgi baǵyttary týraly aıtyp berdi, dep habarlady banktiń baspasóz qyzmetinen.
Tólem júıeleri jumysyn reglamentteý máselesine toqtalǵan E. Ashyqbekov, bul turǵyda negizgi túsinikter («tólem júıesi», «operatordyń» jáne tólem júıeleri qatysýshylarynyń» túsinikteri), tólem júıelerin uıymdastyrý tártibi men jumysy qarastyrylǵanan jetkizdi. Sonymen qatar halyqaralyq standarttarǵa sáıkes, olardyń jiktelýi engiziledi.
UB ókili atalǵan zań jobasynyń tólem júıeleri naryqtaryn retteý jáne tólemder men aqsha aýdarymdaryn iske asyrý tártibin aıqyndaý sekildi baǵyttaryn atap ótti.
«Zań jobasymen naryqtyń sýbektıvti quramy aıqyndaldy, tólem qyzmetterin jetkizýshilerdiń túsinigi men dárejeleri engiziledi (bankter, uıymdar, tólem agentteri), sondaı-aq olardyń qyzmetin retteıtin erejeler jáne olar iske asyratyn tólem qyzmetteriniń naqty túrleri aıqyndalady»,-dedi E. Ashyqbekov.
Osy rette ol jeke tólem uıymdary QR Ulttyq bankinde eseptik tirkeýden ótýi tıis ekenin atap ótti.
«Zań jobasy tólem agentteri jelisi arqyly tólem qyzmetteriniń belgili bir túrlerin banktermen jasaý múmkindigin qarastyrady. Bul óz kezeginde halyq úshin bazalyq bankterdiń qyzmetterine qoljetimdiligin arttyrýǵa múmkindik beredi»,-dep atap ótti QR UB ókili.
