QR Ulttyq banki «Sekseýil» eskertkish kúmis monetalaryn shyǵardy
ASTANA. QazAqparat - «Qazaqstannyń florasy men faýnasy» monetalar serııasynan «Sekseýil» eskertkish kúmis monetalaryn aınalysqa shyǵarý týraly 2016 jylǵy 19 tamyz Almaty q. Qazaqstan Respýblıkasynyń Ulttyq Banki 2016 jylǵy 19 tamyzda «Qazaqstannyń florasy men faýnasy» monetalar serııasynan nomınaly 500 teńgelik, «rroof» sapaly «Sekseýil» eskertkish kúmis monetalaryn aınalysqa shyǵarady.
Moneta sopaqsha formaly. Monetalardyń bet jaǵynda (aversinde) Jer ǵalamsharyn meken etetinderdiń barlyǵyna uqypty qaraýdy bildiretin onyń adam alaqanyndaǵy stıldendirilgen beınesi, nomınalyn bildiretin «500 TEŃGE» degen jazý, moneta daıyndalǵan metaldy, onyń synamyn jáne massasyn bildiretin «Ag 925 24 g» degen jazý bar. Joǵarǵy bóliginde Qazaqstan Respýblıkasy Ulttyq Bankiniń logotıpi ornalasqan. Monetany aınaldyra memlekettik tilde «QAZAQSTAN ULTTYQ BANKІ» jáne aǵylshyn tilinde «NATIONAL BANK OF KAZAKHSTAN» degen jazý bar. Monetalardyń reversinde shól dalada gúldep turǵan sekseýildiń beınesi jáne soǵylǵan jylyn bildiretin «2016» degen san beınelengen. Monetany aınaldyra memlekettik tilde «SEKSEÝIL» jáne osy túrdiń latyn tilindegi zoologııalyq ataýy «HALOXYLON» degen jazý bar. Monetanyń oń jaǵynda gúldep turǵan sekseýildiń bir butaǵynyń ulǵaıtqysh shyny arqyly kóringen beınesi berilgen. Butaqtyń túsi tampomór tehnologııasy arqyly oryndalǵan. Monetalardyń bet jáne syrt jaǵyndaǵy beıneler men jazbalar bederlengen. Aınaldyra shyǵyńqy jıek júrgizilgen. Qyry (gýrty) bederli. Monetalar 925 synamdy kúmisten jasalǵan, massasy - 24± 0, 24 gramm, sopaqsha 38,61 - 28,81 mm., daıyndaý sapasy - «proof», taralymy - 3 myń dana.
Nomınaly 500 teńgelik eskertkish monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna jáne aýdarym jasaý úshin qabyldanýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady. Sekseýil (lat. Halóxylon) - aǵash ósimdikteriniń túri. Shól dalada ósetin aǵash toǵaıy - sekseýil ormanyn qalyptastyrady. Asha butaqty jáne jas butaqtary synǵysh butalar nemese bıik emes aǵashtar. Japyraqtary bir-birine qarsy ornalasqan usaq tússiz qabyrshaq nemese dóńes pishindes. Dińi tegis emes, myqty, keıde synǵysh bolyp keledi. Qabyǵy aq, qara nemese qońyr tústi. Moneta reversinde tampomór paıdalana otyryp oryndalǵan.
Eskertkish monetalardy «Qazaqstan Respýblıkasy Ulttyq Bankiniń Qazaqstan teńge saraıy» sharýashylyq júrgizý quqyǵyndaǵy respýblıkalyq memlekettik kásiporny daıyndaǵan. Monetalardyń dızaıny Qazaqstan Respýblıkasy Prezıdentiniń 2003 jylǵy 25 qyrkúıektegi № 1193 Jarlyǵymen bekitilgen Qazaqstan teńgesi - ulttyq valıýta banknottary men monetalary dızaınynyń tujyrymdamasyna sáıkes ázirlengen. «Proof» sapasymen jasalǵan eskertkish monetalar kollektsııalyq quny boıynsha satýǵa arnalǵan. Olar kádesyılyq oraýmen shyǵarylady jáne Qazaqstan Respýblıkasy Ulttyq Bankiniń memlekettik, orys jáne aǵylshyn tilderindegi nómirlik sapa sertıfıkatymen jabdyqtalǵan.
