QR Ulttyq banki «Kórkem gımnastıka. Olımpıada oıyndary 2016» eskertkish monetasyn shyǵardy
ALMATY. QazAqparat - Qazaqstanda 2016 jylǵy 24 mamyrdan bastap «proof» sapasymen nomınaly 100 teńgelik «Kórkem gımnastıka. Olımpıada oıyndary 2016» eskertkish kúmis monetasy aınalymǵa shyǵaryldy. Bul týraly búgin QR Ulttyq bankiniń baspasóz qyzmetinen habarlady.
Monetanyń bet jaǵynyń (aversinde) tómengi bóliginde stadıonnyń stıldendirilgen beınesiniń qorshaýynda Qazaqstan Respýblıkasynyń Eltańbasy, moneta daıyndalǵan metaldy, onyń synamasyn jáne massasyn bildiretin «Ag 925 20 g» degen jazba jáne soǵylǵan jylyn bildiretin «2016» degen jazý beınelengen. Sol bóliginde monetanyń nomınalyn bildiretin «100 TENGE» degen jazý, al joǵary bóliginde Qazaqstan Respýblıkasy Ulttyq Bankiniń logotıpi bar. Monetanyń jıeginde aınaldyra memlekettik tilde «QAZAQSTAN ULTTYQ BANKІ» dep oıylyp jazylǵan jazba ornalasqan.
Al monetanyń syrt jaǵynyń (reversinde) ortalyq bóliginde túrli-tústi stıldendirilgen lentanyń aıasynda kórkem gımnastıka boıynsha saıys sátindegi sportshy qyz, eki shoqpar taıaq jáne Olımpıada oıyndaryn ótkizý jylyn bildiretin «2016» degen san beınelengen. Aınaldyra aǵylshyn tilinde «OLYMPIC GAMES» degen oıylǵan jazba ornalasqan.
Monetanyń betki jáne syrt jaqtaryndaǵy beıneler men jazbalar bederlengen. Aınaldyra shyǵyńqy jıek júrgizilgen.
Qyry (gýrty) bederli. Moneta 925 synamdy kúmisten jasalǵan, massasy - 20 gr, dıametri - 37 mm, daıyndaý sapasy - «proof», eń kóp taralymy - 3 myń dana. Monetalardyń tús boıynsha sheshimi tampobasý tehnologııasy arqyly oryndalǵan.
«Nomınaldyq quny 100 teńgelik eskertkish monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna esepteý úshin jáne aýdarym jasaý úshin qabyldanýǵa mindetti. Sondaı-aq, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady. Monetalar dızaıny Qazaqstan Respýblıkasy Prezıdentiniń 2003 jylǵy 25 qyrkúıektegi № 1193 Jarlyǵymen bekitilgen Qazaqstan teńgesi - ulttyq valıýta banknottary men monetalary dızaınynyń tujyrymdamasyna sáıkes ázirlengen», - delingen habarlamada.
Aıta ketelik, «Proof» sapasymen jasalǵan eskertkish kúmis monetalar kollektsııalyq quny boıynsha satýǵa arnalǵan. Olar kádesyılyq oramamen shyǵarylady jáne Qazaqstan Respýblıkasy Ulttyq Bankiniń memlekettik, orys jáne aǵylshyn tilderindegi nómirlik sapa sertıfıkatymen jabdyqtalǵan.
Monetany Qazaqstan Respýblıkasy Ulttyq Bankiniń barlyq fılıaldarynda, sondaı-aq QRUB-nyń www.nationalbank.kz saıtynyń «Ulttyq valıýta» paraqshasyndaǵy Internet-dúken arqyly satyp alýǵa bolady.
