QR Ulttyq banki Delta Bank lıtsenzııasyn qarashaǵa deıin toqtatty
ALMATY. QazAqparat - Ulttyq bank «Delta Bank» AQ-tyń jeke jáne zańdy tulǵalardyń depozıtterin qabyldaýǵa, jeke jáne zańdy tulǵalardyń bank shottaryn ashýǵa lıtsenzııasyn toqtatty, dep habarlaıdy QazAqparat tilshisi bas qarjy retteýshisine silteme jasap.
«Qazaqstan Respýblıkasy Ulttyq banki basqarmasynyń 2017 jylǵy 31 shildedegi №152 qaýlysymen 2017 jylǵy 4 tamyzdan bastap qosa alǵanda 2017 jylǵy 1 qarashaǵa deıin «Delta Bank» AQ-tyń jeke jáne zańdy tulǵalardyń depozıtterin qabyldaýǵa, jeke jáne zańdy tulǵalardyń bank shottaryn ashýǵa lıtsenzııasy toqtatyla turady.
Bul sheshimdi Ulttyq bank atalmysh banktiń banktik zańnama talaptaryn buzýyna baılanysty «Qazaqstan Respýblıkasyndaǵy bankter jáne bank qyzmeti týraly» Qazaqstan Respýblıkasy Zańy 48-babynyń 1-tarmaǵy v) jáne g) tarmaqshalarynda kózdelgen negizder boıynsha, tólem jáne aýdarym operatsııalary boıynsha sharttyq mindettemelerdi únemi (qatarynan kúntizbelik on eki aı ishinde úsh jáne odan kóp ret) tıisinshe oryndamaý jáne únemi (qatarynan kúntizbelik on eki aı ishinde úsh jáne odan kóp ret) prýdentsııalyq normatıvterdi jáne (nemese) basqa saqtalýy mindetti normalar men lımıtterdi buzǵany úshin ishki baqylaý júıelerin jaqsartý qajettiligi sheńberinde qabyldady», - dep málim eti Ulttyq bank.
Sonymen qatar, lıtsenzııanyń toqtaýy tek jańadan ashylatyn depozıtterge baılanysty, banktiń qoldanystaǵy depozıtteri men klıentterine qyzmet kórsetýge qatysy joq.
2017 jylǵy 1 shildedegi jaǵdaı boıynsha «Delta Bank» AQ jeke tulǵalardan 0,25 mlrd teńge shamasynda, zańdy tulǵalardan 85,6 mlrd teńge shamasynda depozıt qarjysyn qabyldaǵan. Banktiń depozıttik portfeliniń úlesi bank júıesi depozıtteriniń jıyntyq kóleminiń 0,5%-yn quraıdy.
