QR Ulttyq banki «Astana bankiniń» salymshylaryna úndeý joldady
ASTANA. QazAqparat - Qazaqstan Respýblıkasynyń Ulttyq Banki «Astana bankin» lıtsenzııasynan aıyrý týraly sheshim shyǵarýyna baılanysty atalǵan banktiń salymshylaryna úndeý joldady, dep habarlaıdy QazAqparat.
"Qazaqstan Respýblıkasynyń Ulttyq Banki 2018 jylǵy 18 qyrkúıekte Ulttyq Bank Basqarmasynyń «Astana Banki» AQ-ty banktik jáne ózge de operatsııalardy júrgizýge arnalǵan lıtsenzııasynan aıyrý týraly sheshim qabyldaýyna baılanysty jeke tulǵa-salymshylardy teńgemen jáne shetel valıýtasyndaǵy depozıtter, tólem kartochkalaryndaǵy jáne banktik shottardaǵy aqsha Qazaqstannyń depozıtterge kepildik berý qorynyń (budan ári - QDKQ) kepildigimen qorǵalǵanyn eskertedi. Demek, bolashaqta sot bankti májbúrlep taratý týraly sheshim qabyldaǵan jaǵdaıda, QDKQ jeke tulǵa-salymshylarǵa kepildik berilgen ótemaqyny tóleýdi júzege asyrady" delingen habarlamada.
Kepildiktiń eń joǵary shegi:
Teńgemen depozıtter boıynsha - 10 mıllıon teńgege deıin;
Shetel valıýtasyndaǵy depozıtter boıynsha - 5 mıllıon teńgege deıin mólsherdi quraıdy.
Qazaqstannyń depozıtterge kepildik berý qorynyń qarajatynan banktiń mynadaı klıentteri:
jeke tulǵalar,
dara kásipkerler,
jeke sot oryndaýshylary, notarıýstar, advokattar ótemaqy alýǵa quqyly.
Málimetke saı, banktik shottaǵy qaldyq ótelýge tıis. Bank eseptegen syıaqyǵa kepildik berilmeıdi. Eger banktik salym shartynda syıaqyny kapıtaldandyrý kózdelse, onda kapıtaldandyrylǵan syıaqy depozıttiń negizgi somasyna qosylady jáne kepildik obektisi bolady.
«Astana Banki» AQ-ta jeke tulǵalardyń barlyǵy 41,2 mıllıard teńge somaǵa depozıtteri ornalastyrylǵan. Qazaqstannyń depozıtterge kepildik berý qorynyń ótemaqy tóleý boıynsha mindettemeleri 37 mıllıard teńgeni quraıdy.
Bank klıentteriniń 0,1%-nan azynyń kepildik berilgen somadan artyq depozıtteri bar jáne Qazaqstannyń depozıtterge kepildik berý qorynan kepildik berilgen soma sheginde ótemaqy alady, al kepildik berilgen somadan joǵary somadaǵy ótemaqyny taratý komıssııasynan alady.
QRUB Tóraǵasynyń buıryǵymen ýaqytsha ákimshilik taǵaıyndaldy, oǵan «Astana Banki» AQ-tyń barlyq basqarý organynyń ókilettikteri ótti. Ýaqytsha ákimshiliktiń quramyna QRUB mamandary kirdi.
«Astana Banki» AQ-tyń ýaqytsha ákimshiligi sot taratý komıssııasyn taǵaıyndaǵanǵa deıin jumys isteıtin bolady. Ýaqytsha ákimshilik bank múlkiniń saqtalýyn qamtamasyz etý, bankti basqarý, banktiń aktıvterin anyqtaý, uıymnyń aktıvterine, mindettemelerine jáne qujattaryna túgendeý júrgizý úshin taǵaıyndalady. Óziniń jumys isteý kezeńinde ýaqytsha ákimshilik «Astana Banki» AQ-tyń aktıvteri men mindettemelerin satyp alýshy bankke birmezgilde berý múmkindigin baǵalaıdy.
«Astana Banki» AQ-ty májbúrlep taratý týraly sot sheshimi zań kúshine engen kúnnen bastap 14 jumys kúni ishinde QDKQ jumys isteıtin qazaqstandyq bankterdiń qaısysynyń «Astana Banki» AQ-tyń salymshylarymen tólem jónindegi agent retinde jumys isteıtinin jarııalap, salymshylarmen esep aıyrysa bastaıdy. Qoldanystaǵy zańnamaǵa sáıkes, bul banktiń qarjylyq jaǵdaıy turaqty, elimizdiń barlyq jerinde salymshylarǵa qyzmet kórsetýge múmkindik beretin aýqymdy fılıaldar jelisi jáne ınfraqurylymy bolýǵa tıis. Bul bank «Astana Banki» AQ-tyń salymshylarymen QDKQ-nyń atynan jáne onyń qarajaty esebinen jumys isteıtin bolady.
QDKQ tańdap alynǵan agent-bankti jarııalaǵan soń, salymshylar osy banktiń bólimshesine kepildik berilgen ótemaqyny alý úshin ótinish berýge tıis. Agent-bank oǵan qujattar kelip túsken kúnnen bastap 5 jumys kúninen keshiktirmeı tólem jasaýdy júzege asyrady.
Ulttyq Bank, sol sııaqty QDKQ salymshylardy BAQ arqyly jaǵdaıdyń budan ári órbýi týraly habardar etedi. Salymshylar www.kdif.kz saıtynda depozıtterge kepildik berý máseleleri boıynsha qosymsha aqparat alyp, zańnamanyń jańartylǵan redaktsııasymen tanysa alady. Mamandardyń konsýltatsııalary 8 8000 80 10 20 shuǵyl jeli nómiri boıynsha júrgiziledi (qońyraý shalý tegin).
Ýaqytsha ákimshiliktiń jumys isteý máseleleri boıynsha Qazaqstannyń Ulttyq Bankine «QUB Online» mobıldi qosymshasy arqyly ótinish jasaýdy suraımyz.
