QR Ulttyq bank halyqqa altyn quımalardy satýdy bastaıdy
ASTANA. QazAqparat - Qazaqstanda halyqqa arnalǵan tazartylǵan altynnyń ólsheýish quımalaryn satý men satyp alý baǵdarlamasy iske qosylady, dep habarlaıdy QazAqparat.
«2016 jylǵy qyrkúıekte Memleket basshysynyń qatysýymen ótken Úkimettiń keńeıtilgen otyrysynda, Ulttyq Bank altyn quımalardyń bizdiń azamattarymyz úshin ınvestıtsııalardy júzege asyrý jáne jınaq aqshasy úshin jańa qural bola alatynyn atap ótti. Búgin biz osy joba boıynsha barlyq daıyndyq jumystarynyń aıaqtalǵanyn jáne búgingi kúnnen bastap altyn quımalardyń bizdiń azamattarymyz úshin qoljetimdi bolatyny týraly habarlaımyz», - dedi D. Aqyshev.
Ol altyn quımalardyń Qazaqstan teńge saraıynda daıyndalǵanyn jáne 10, 20, 50 jáne 100 gramm bolyp tórt túrde usynylǵanyn, aýqymdy fılıaldyq jelisi bar ekinshi deńgeıdegi bankter arqyly satylatyny týraly habarlady. «Ólsheýish altyn quımalardyń shıkizatynan bastap - túpkilikti ónimine deıin tek qazaqstandyq bolyp tabylatynyna nazar aýdarǵan jón. Ulttyq Bank altyn quımalarynyń «tórt toǵyzdyq» synamdy joǵary sapasyna kepildik beredi», - dep atap ótti D. Aqyshev.
Onyń aıtýynsha, qazir Qazaqstan azamattary úshin shetel jınaqtaýdyń negizgi tásili bankterdegi depozıtter men qolma-qol aqsha valıýtasy bolyp tabylady. «Ulttyq Bank atalǵan quraldardy naqty altyn túrinde tolyqtyrýdy usynady, - dep sózin jalǵastyrdy QRUB basshysy. - Bizdiń negizgi ıdeıamyz altyndy halyqqa satý ǵana emes, ótimdi ári belsendi naryqty iske qosý, onda azamattar atalǵan altyndy jınaq aqsha úshin saqtaıtynyn nemese kiris alý úshin ony satyp alý nemese satý boıynsha operatsııany jasaıtynyn ózderi tańdaı alady.»
Ol búgingi kúni baǵdarlamaǵa eki bank - Qazaqstan Halyq banki jáne Eýrazııalyq banktiń qatysatyndyǵyn rastaǵandyǵy jóninde aıtty. «Baǵdarlamanyń bastapqy kezeńi sheńberinde quımalardy satyp alýǵa jáne satýǵa bolatyn tek tórt qala aıqyndaldy. Ol - Astana, Almaty, Óskemen jáne Atyraý. Tanymaldyǵynyń ósýine qaraı ýaqyt óte altyn quımalaryn satý geografııasynyń keńeıetindigine senimdimin» - dep naqtylady
D. Aqyshev.
Quımanyń 10 gramy- 127 myń teńge, 20 gramm - 254 myń teńge, 50 gramm - 635 myń teńge, 100 gramm - 1 mln. 270 myń teńge turady.
Ólsheýish altyn quımalar arnaıy qorǵanysh vakýýmdy oraýda shyǵarylady. Oraýdyń bútindigi altyn quımany usynǵan kezde bank ony qandaı da bir uzaq saraptamasyz satyp alýǵa mindetti bolatynyn bildiredi. Oraý ashylǵan jaǵdaıda bank bul quımany ınkassoǵa qabyldaıdy, ıaǵnı Ulttyq Bank saraptama júrgizgennen keıin ǵana esep aıyrysady. Al bul uzaq ýaqytty jáne qosymsha komıssııany tóleýdi talap etedi.
