QR Ulttyq akademııalyq kitaphanasynda Elbasy Joldaýy talqylandy

ASTANA. QazAqparat - QR Ulttyq akademııalyq kitaphanasynda Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» týraly Qazaqstan halqyna Joldaýy talqylandy, dep habarlaıdy QazAqparat tilshisi.

Talqylaýǵa Mádenıet jáne sport máseleleri jónindegi Qoǵamdyq keńes músheleri jınaldy.

«Memleket basshysynyń Joldaýy - qazaqstandyq qoǵamnyń áleýmettik-ekonomıkalyq damý baǵyttary aıtylatyn mańyzdy saıası qujat. Shyn máninde bul alda turǵan eń kúrdeli máselelerdiń toǵysýy. Basqarý ǵylymynda qyzyqty aksıoma bar, tıimdi basqarý men damý úshin úsh nárse qajet: júıe, perspektıva jáne baqylaý. Kezekti ret Elbasy eldegi barlyq basqarýshylarǵa qoǵam aldynda turǵan mindetterdi júzege asyrýǵa uqyptylyqpen jáne jasampazdyqpen kelý úlgisin kórsetti», - dedi L.N.Gýmılev atyndaǵy EUÝ Qazaqstan halqy Assambleıasy kafedrasynyń meńgerýshisi Anatolıı Bashmakov.

Sondaı-aq, QHA kafedrasynyń meńgerýshisi Joldaýdyń adamı kapıtaldyń damýy jóninde aıtylatyn jetinshi baǵytyna erekshe toqtaldy.

«Memleket basshysy keltirgen barlyq 10 baǵytpen tanystyp shyqtym jáne men úshin jetinshi baǵyt asa mańyzdy. Munda adamı kapıtal týraly oqı otyryp, eń basty másele - mádenıettiń damýy oıǵa oraldy. Sebebi, mádenıet túsinigine ekonomıkanyń, tehnologııalardyń, bıznestiń jáne tutas adamı kapıtaldyń basty strategııalyq resýrsy retinde qaraımyn. Bul faktor bolmasa, alǵa qoıylǵan 10 mindettiń biri de oryndalmaıdy. Sondyqtan, Elbasy joldaýynyń júzege asyrylýy mádenıettiń damýyna tikeleı baılanysty», - dep óz sózin túıindedi A.Bashmakov.