QR Ulttyq akademııalyq kitaphanasynda ashyq esik kúni ótýde

Sáýirdiń 23-i - dúnıejúzi kitaphanashylarymen qatar, Akademııalyq kitaphana qyzmetkerleri úshin de aıtýly data, sebebi osydan 7 jyl buryn atylmysh mádenı ortalyqty qurý týraly QR Úkimetiniń qaýlysy shyqqan bolatyn.

Ashyq esik kúnderi kitaphana qabyrǵasynda jylyna bir ret ótkiziletinine qaramastan, elordalyq kitaphanashylardy jyl saıyn jınap, tájirıbemen bólisý mundaǵy qalyptasqan dástúr.

Búgingi shara barysynda da qaladaǵy barlyq kitaphanashylar UAK qabyrǵasynda bas qosty. Merekelik jıynda kitaphana isiniń ardagerlerin marapattaý rásimi ótip, QR Táýelsizdiginiń 20 jyldyǵyna arnalǵan «Jeńisterge jol ashqan jarqyn jyldar» atty ádistemelik quraldyń tusaýy kesildi. Buny otandyq kitaphanashylar el táýelsizdigine arnalǵan is-sharalardy ótkizýge, uıymdastyrýǵa kómekshi qural maqsatynda paıdalana alady.

Jıynnan soń ashyq esik kúni sharasy UAK Kórkem ádebıet abonementiniń ashylý saltanatymen ary qaraı jalǵasyn tapty. Kitap qory 6300 dana bolatyn atalmysh zaldan oqyrmandar «klassıka», zamanaýı ádebıet», «tarıhı roman», «fantastıka», «detektıv», «poezııa», «dramatýrgııa» jáne «balalar ádebıeti» janrlarynda qajetti kitapty alyp oqı alady. Sonymen qatar munda «Qazaq almanaǵy», «Qazaqstan muraǵattary», «Nıva» syndy 12 ataýly jýrnaldar qoıylǵan.

Túske qaraı kitaphanada «Maıtalman. Kemeńger. Bolashaq» atty tok-shoý uıymdastyryldy. QR Kitaphanalar qaýymdastyǵynyń prezıdenti Roza Berdiǵalıevanyń qatysýymen bolǵan sharanyń negizgi maqsaty - tájirıbelermen, sheberliktermen bólisý. «Eldiń ardager kitaphanashylary bolashaq kitaphana qandaı bolý kerek jáne zamanaýı kitaphanashy qandaı qasıetterge ıe bolý kerek degen taqyrypta óz pikirlerin salady»,-deıdi uıymdastyrýshylar. Tústen keıin kitaphanada alǵash ret qurylǵan «Jansýsar» jas aqyndar klýbynyń tusaýkeseri ótkizilmek. «Jas júrek jaıyp saýsaǵyn» degen atpen ile ótetin poezııalyq keshke Farıza Ońǵarsynova, Serik Turǵynbekuly, Nesipbek Aıtuly, Darhan Qydyráli, Aıbatyr Seıtaq syndy aqyndar qatysady.

Búginde elimizdiń bas kitaphanasynyń 25 myńǵa jýyq oqyrmany bar, olardyń qoldanysyna 600 myńǵa jýyq kitap pen 5 myńnan astam kitaptyń elektrondy kóshirmeleri usynylyp otyr. Olardyń qory satyp alynǵan, syıǵa tartylǵan, memlekettik tapsyrys jáne «Mádenı mura» baǵdarlamasy sheńberinde shyǵyp jatqan kitaptarmen kúnnen-kúnge tolyǵa túsýde.

Osy jyldar ishinde Qazaq ulttyq elektrondy kitaphananyń qyzmeti men onyń derekter bazasy, qashyqtyqtan tapsyrys berý júıesi, kitaptardy oqyrmandarǵa qysqa ýaqytta jetkizýge múmkindik beretin zamanaýı qondyrǵy - telelıfttiń qyzmeti men «QR UAK - Astana kitaphanalarynyń ádistemelik ortalyǵy» iske qosyldy.