QR Ulttyq akademııalyq kitaphanasy Dúnıejúzilik kitap kúni men óziniń qurylǵan kúnin ashyq esik kúnimen atap ótti
ASTANA. Sáýirdiń 23-i. QazAqparat /Gúlmıra Álıakparova/ - Sáýirdiń 23-i - Dúnıejúzilik kitap kúnine oraı, búgin QR Ulttyq akademııalyq kitaphanada Astana qalasynyń kitaphanashylaryna arnalǵan ashyq esik kúni ótti.
Sáýirdiń 23-i - dúnıejúzi kitaphanashylarymen qatar, Akademııalyq kitaphana qyzmetkerleri úshin de aıtýly data, sebebi osydan 6 jyl buryn atylmysh mádenı ortalyqty qurý týraly QR Úkimetiniń qaýlysy shyqqan bolatyn.
Búginde elimizdiń bas kitaphanasynyń 25 myńǵa jýyq oqyrmany bar, olardyń qoldanysyna 600 myńǵa jýyq kitap pen 5-myńnan astam kitaptyń elektrondy kóshirmeleri usynylyp otyr.
UAK Ǵylymı-taldaý ortalyǵy jetekshisiniń orynbasary Qaıyrken Nuralınovanyń aıtýynsha, QR Mádenıet mınıstrliginiń kitaphanalardy jetildirý baǵdarlamasynyń aıasynda, búginde eldegi kóptegen kitaphanalar zamanaýı tehnıkalarmen jaraqtandyryldy. Olardyń qory satyp alynǵan, syıǵa tartylǵan, memlekettik tapsyrys jáne Mádenı mura baǵdarlamasy sheńberinde shyǵyp jatqan kitaptarmen kúnnen-kúnge tolyǵa túsýde. Degenmen bul salada túıitkilder de az emes. Máselen, qazir Qazaqstannyń birde-bir joǵary oqý ornynda kitaphana mamandyǵy fakýlteti joq. «Sondyqtan mamandar tapshylyǵy men olardy daıarlaý búgingi kúnniń ózekti máselesine aınalyp otyr», - deıdi ol.
Ashyq esik kúnderi kitaphana qabyrǵasynda alǵash ótkizilgenimen, elordalyq kitaphanashylardy jyl saıyn jınap, tájirıbemen bólisý mundaǵy qalyptasqan dástúr.
Máselen, búgin Qazaq ulttyq elektrondy kitaphananyń qyzmeti men onyń derekter bazasy, qashyqtyqtan tapsyrys berý júıesi, kitaptardy oqyrmandarǵa qysqa ýaqytta jetkizýge múmkindik beretin zamanaýı qondyrǵy - telelıfttiń qyzmeti men «QR UAK - Astana kitaphanalarynyń ádistemelik ortalyǵy» tanystyrylyp, sheberlik sabaqtar ótkizildi. Sondaı-aq shara barysynda UAK shyǵara bastaǵan «Kitap patshalyǵy» atty jýrnaldyń tusaýy kesildi.
