QR Ulttyq akademııalyq kitaphanada kitaptardy oqyrmandarǵa 5 mınýtta jetkizýge múmkindik beretin zamanaýı qondyrǵy engizildi
ASTANA. Sáýirdiń 23-i. QazAqparat /Aıgúl Aıtmuqanova/ - QR Ulttyq akademııalyq kitaphanada qoldanysqa engizilgen - «Telelıft» tasymaldaý júıesi oqyrmandarǵa kitaptardy 5 mınýtta jetkizedi.
Bul týraly atalmysh kitaphanada ótken ashyq esik kúninde Kitap saqtaý bóliminiń bas saqtaýshysy Kenje Kerimbekova málim etti, dep habarlaıdy QazAqparat.
«Telelıft» tasymaldaý júıesi engizilgeli beri jumys áldeqaıda jeńildedi. Óıtkeni biz kitap tasymaımyz, árbir stansynyń janynda óziniń pýlti, kitap salatyn konteınerleri bar. Ári oqyrmandar tapsyrystaryn burynǵydaı jarty saǵattan bir saǵatqa deıin kútip otyrmaıtyn boldy», - dep atap ótti K.Kerimbekova.
Qazaqstan «Telelıft» júıesi ornatylǵan Ortalyq Azııadaǵy tuńǵysh, TMD elderiniń ishinde ekinshi el. Belarýstyń Ulttyq kitaphanasy bul júıege qosylǵanyna 5 jyl bolsa, Qazaqstannyń Bas kitaphanasy zamanaýı júıeni jeltoqsannyń 25-inen bastap ıgere bastady.
«Telelıft» júıesi jolynyń jalpy uzyndyǵy - 450 metr. Onyń boıynda 16 stansa jáne kitaptar tıelgen arbalardyń baǵytyn ózgertetin 13 nusqaý ornatylǵan. Salmaǵy 10 kıláǵa deıin ádebıet tıeletin arbasha pýlt arqyly basqarylyp, saqtaý qorlarynan oqý zalyna jetkiziledi.
«Telelıft» júıesin ornatý biz úshin úlken jetistik. Qazirgi tańda arab elderi, AQSh-ta relstik stellajdar qoldanylady. Qazir ulttyq kitaphana qory bir jarym mıllıondaı kitap saqtaı alsa, relstik stellajdar eki jarym mıllıonǵa deıin kitap qoryn saqtaýǵa múmkindik beredi. Qajetti qarajat bólinse, 2012 jyly osyndaı stellajdardy ornatý oıymyzda bar», - dedi K.Kerimbekova.
