QR Ulttyq Akademııalyq kitaphanada Dáýletkereı Shyǵaıulynyń 190 jyldyǵyna arnalǵan mýzykalyq-tanymdyq kesh ótti
STANA. Aqpannyń 19-y. QazAqparat /Gúlmıra Álıakparova/ - Búgin QR Ulttyq Akademııalyq kitaphanada belgili kúıshi, kompozıtor Dáýletkereı Shyǵaıulynyń týǵanyna 190 jyl tolýyna arnalǵan «Qudyret rýhyn kúı tilimen kestelegen Bapas baba» atty mýzykalyq-tanymdyq kesh ótti,
dep habarlaıdy QazAqparat.
Qazaq Ulttyq óner ýnıversıteti dombyra kafedrasynyń meńgerýshisi, Dáýletkereı kúılerin zertteýshi ǵalym Orynbaı Dúısenniń aıtýynsha, kúı óneriniń atasy Dáýletkereı Shyǵaıuly halyq arasynda úlken qurmetke, iltıpatqa ıe bolyp, oǵan Bapas degen esim berilgen. D.Shyǵaıuly tóre tartystyń negizin salǵan kúıshi.
Keshte «Dáýletkereı jáne Salyq Babajanov», «Dáýletkereı - sýretker kúıshi» taqyryptary qamtylyp, kúıleri oryndaldy.
Kúıshi Dáýletkereı 1820-21 jyldar shamasynda burynǵy Bókeı ordasyndaǵy Qaramola degen jerde dúnıege kelgen. Ol jónindegi kóptegen aqparat Ahmet Jubanovtyń eren eńbeginiń arqasynda qaıta oraldy. Dáýletkereı dombyra tartýdy Músiráliden úırenedi. Ol orystyń balalaıkasynda, gıtara men mandolınada da sheber oınaǵan. Onyń eń áýelgi shyǵarmalarynyń biri Aqbala atty sulý qyzǵa arnaǵan «Aqjeleń» kúıi. Al «Qońyr», «Jeldirme», «Kerilme», «Ysqyrma», «Qosishek» syndy kúıleri ómirdegi túrli kórinisterdi sýretteıdi. Halqynyń taǵdyry úshin tereń tolǵanyp, tebirengen úzdik kúıleri - «Topan» jáne «Jiger». «Jiger» kúıi Dáýletkereıdiń shyǵarmashylyǵynyń shyrqaý shyńy.
D.Shyǵaıuly HІH ǵasyrdyń 80-shi jyldarynda ómirden ozdy. Zamandastary men shákirtteri qasterlep jetkizgen Dáýletkereıdiń kúıleri halqymyzdyń mýzykasynyń altyn qorynan oryn aldy.
