QR Ulttyq mýzeıde «Oǵyz dalalyq mádenıetiniń izderi» atty halyqaralyq kórme ótti
ASTANA. KAZINFORM — QR Mádenıet jáne aqparat mınıstrliginiń qoldaýymen QR Ulttyq mýzeıinde «Oǵyz dalalyq mádenıetiniń izderi» atty halyqaralyq kórmeniń saltanatty ashylý rásimi men ǵylymı semınar ótti.
Dástúrli semınar aıasynda tarıhshylar, arheologtar, mádenıettanýshylar, etnologtar, shyǵystanýshylar, mýzeı jáne muraǵat qyzmetkerleri, sondaı-aq akademııalyq jáne ǵylymı-bilim berý qaýymdastyǵy ókilderi bas qosty.
— Bul kórmege kóne Jankent qalasynan tabylǵan jádigerler qoıylǵan. Jalpy Qazaqstan jerinde Oǵyz arheologııasy kóp zerttelmegen aqtańdaq kezeńderdiń biri sanalady. Sondyqtan Jankenttegi zertteýler, tabylǵan jádigerler osy bostyqtyń ornyn tolyqtaıtyn, úlgi bolatyn, bolashaq izdenýlerge jol bastaıtyn qundylyǵymen erekshe. Biz is-shara arqyly kópshilikke Oǵyzdardyń memleket qalyptastyrýdaǵy ornyn, sáýlet qurylystary men zergerlik buıymdaryn, qolóner týyndylaryn, antropologııalyq jáne arheologııalyq artefaktilerin tanystyrdyq, — dedi Á.H. Marǵulan atyndaǵy Arheologııa ınstıtýtynyń Astana qalasyndaǵy fılıalynyń dırektory Ázilhan Tájekeev.
Shara barysynda ǵylymı-gýmanıtarlyq alań qurý arqyly Qazaqstan aýmaǵyndaǵy oǵyz mádenıetiniń izderin anyqtaý jáne ǵylymı turǵydan zerdeleý máseleleri qarastyryldy. Sonymen qatar túrki halyqtarynyń tarıhı sabaqtastyǵyn kórsetýge, oǵyz murasyn saqtaý men nasıhattaý joldaryn aıqyndaýǵa basa nazar aýdaryldy. Semınar ǵylymı qaýymdastyq arasynda pikir almasýǵa jaǵdaı jasady.
— Biz Oǵyz mádenıetiniń buryn bilmegen keremet jaýharlaryn, qundy jádigerlerin, tarıhı arheologııalyq eskertkishterin osy ortaq tarıhymyzdan syr shertetin erekshe kórmeden tamashalap, rıza boldyq. Oǵyz mádenıeti Qazaqstan jerinen, Ortalyq azııa aımaǵynan bastaý alyp, keıinnen Seljúk memleketi, Osman ımperııasy, qazirgi Túrkııa eli bolyp jalǵasyp kele jatyr. Meniń oıymsha Oǵyzdar áli de ómir súrip jatyr. Bul barlyq Túrki tildes halyqtardyń ortaq mádenıeti, ortaq tarıhy. Sondyqtan búgingi is-sharanyń basty maqsaty Oǵyz murasyn urpaqqa nasıhattap, tarıhyn umytpaý dep oılaımyn. Túrkııa eli de osy ortaq iske atsalysyp, tájirıbemizben bólisip, aldaǵy ýaqytta arheologııalyq zertteýlerdi birlikte júrgizýge tilektespiz», — dedi Túrkııa Respýblıkasy Mádenıet jáne týrızm mınıstrliginiń Mádenı muralar jáne mýzeıler bas basqarmasy bas dırektorynyń orynbasary Búlent Gónúltash.
Eske sala keteıik, buǵan deıin Ejelgi Irannyń tańǵajaıyp dástúrli «muzdatqyshtary» týraly jazǵamyz.