QR ulttyq komandasynyń nyshandary salynǵan sport kıimderi satylyp jatqany ras pa
ASTANA. KAZINFORM – «Sportty damytý dırektsııasy» RMQK óz múddesin qorǵaý, memlekettik uıymdarǵa kontrafakti ónimdi bıýdjet qarajatyna satyp alý nemese ony jetkizý táýekelderin boldyrmaý maqsatynda resm habar taratty.
Áleýmettik jelilerde Qazaqstan Respýblıkasy ulttyq komandasynyń nyshandary salynǵan sport kıimderi satylyp jatqan beınematerıaldardyń taralýyna baılanysty, QR Týrızm jáne sport mınıstrliginiń Sportty damytý dırektsııasy túsinikteme berýdi jón dep sanaıdy,-delingen habarlamada.
Ondaǵy derekterde Under Armour brendiniń aqparaty boıynsha, QR Ulttyq komandasynyń resmı kıim jıyntyǵy qazirgi ýaqytta daıyn túrde óndirilmeıtini jáne satylymǵa shyǵarylmaıtyny aıtylǵan. Al Under Armour resmı dúkenderinde tek brendtiń túpnusqa ónimderi ǵana bar.
Demek jelide QR Ulttyq quramasynyń resmı kıimi retinde kórsetilgen ónimder Under Armour kompanııasynyń resmı ekıpırovkasy emes. Sondaı-aq mundaı jıyntyqtardyń túpnusqa ónim qunynan edáýir erekshelenetin baǵamen satylýy olardyń sapasy men túpnusqalyǵyna degen kúmán týdyrady.
-Azamattardy saqtyq tanytýǵa jáne shyǵý tegi belgisiz taýarlardy satyp alýdan aýlaq bolý úshin sport kıimderin tek Under Armour resmı dúkenderinen alýǵa shaqyramyz.
«Sportty damytý dırektsııasy» RMQK atalǵan ónimniń taýar belgisiniń quqyq ıelenýshisi, óndirýshisi nemese satýshysy emes. Sonymen qatar naryqtaǵy úshinshi tarap satatyn taýarǵa baǵa berýge ókiletti emes,-delingen habarlamada.
Ónimniń túpnusqalyǵyna nemese zııatkerlik menshik quqyǵyn qorǵaýǵa baılanysty suraq týyndaǵan jaǵdaıda, olardy sheshý Qazaqstan Respýblıkasynyń zańnamasyna sáıkes quqyq ıelenýshiniń jáne basqa da ókiletti organdardyń quzyretine jatady.
«Sportty damytý dırektsııasy» RMQK óndirýshige óziniń erekshe quqyqtaryn qorǵaý boıynsha sharalar qabyldaýdy, sondaı-aq taýar belgisi men ónerkásiptik úlginiń tirkelgen-tirkelmegenin tekserýdi talap etip resmı hat joldaıdy. Kontrafakt belgileri anyqtalǵan jaǵdaıda tıis aqparat ádilet jáne quqyq qorǵaý organdaryna jiberiledi.
Osyǵan deıin habarlaǵanymyzdaı, World Boxing irikteý týrnırlerin ótkizetin elderdi anyqtady.
