Úkimet shet elderden kólik ákelý men paıdalaný talaptaryn bekitti

Úkimet basshysy Álıhan Smaıylov shet memeleketterde tirkelgen kólikterdi Qazaqstanǵa ákelý jáne olardy paıdalaný talaptaryn bekitti, dep habarlaıdy Kazinform.

Premer-mınıstr qol qoıǵan Qaýly primeminister.kz saıtynda jarııalandy.

Qujatqa qosa usynylǵan qosymshada:

• basqa memlekettiń quzyretti organynda tirkelgen avtokólik quraldarynyń Qazaqstan Respýblıkasynyń aýmaǵyna kirý (ákeliný) tártibi men talaptary;
• basqa memlekettiń quzyretti organynda tirkelgen avtokólik quraldaryn Qazaqstan Respýblıkasynyń aýmaǵynda paıdalaný qaǵıdalary men talaptary jazylǵan.

Qaýly alǵashqy resmı jarııalanǵan kúninen kúntizbelik on kún ótken soń qoldanysqa engiziledi.

Eske salaıyq, bıylǵy 23 qańtar - 1 shilde aralyǵynda Qazaqstanǵa 2022 jyldyń 1 qyrkúıegine deıin zańsyz ákelingen kólikter zańdastyryldy. Nátıjesinde 220 myńnan astam avtokólik tirkeldi.

Al 2022 jyldyń 1 qyrkúıeginen keıin ákelingen kólikter zańnyń barlyq talaptaryna saı, jeńildiksiz tirkeýge jatady.