QR Úkimeti Pavlodar, Ekibastuz jáne Aqsý qalalarynda jylý jelilerin salýǵa 9 mlrd teńge bóldi

ASTANA. KAZINFORM - Bul qalalardaǵy jelilerdiń ortasha tozý kórsetkishi 59-90% aralyǵynda, dep habarlaıdy Úkimettiń resmı saıty.

Memleket basshysynyń turǵyn úı-kommýnaldyq ınfraqurylymdy keshendi jańǵyrtý jónindegi tapsyrmalaryn oryndaý maqsatynda QR Premer-Mınıstri Oljas Bektenov Pavlodar, Ekibastuz jáne Aqsý qalalarynda jylý jelilerin salýǵa jáne rekonstrýktsııalaýǵa Úkimet rezervinen 9 mlrd teńge bólý týraly qaýlyǵa qol qoıdy.

Osylaısha, Pavlodarda (3,6 mlrd teńge) uzyndyǵy 2,5 shaqyrym bolatyn TM-13 jylý magıstrali salynady. Bul 41,5 myń adam turatyn Pavlov – Shevchenko – Kataev kósheleri ornalasqan aýdandaǵy kóppáterli turǵyn úılerdi turaqty jylýmen qamtamasyz etýge múmkindik beredi.

Ekibastuzda jalpy uzyndyǵy shamamen 4 shaqyrym (3,6 mlrd teńge) bolatyn TM-1 jáne TM-3 jylý magıstraldarynyń ýchaskeleri rekonstrýktsııalanady. Osy jumystyń arqasynda jańa turǵyn úılerdi, áleýmettik mekemelerdi, shaǵyn jáne orta bıznes nysandaryn qosý kózdelgen. Bul 2 myńnan astam adamdy qamtıdy.

Qalǵan 1,8 mlrd teńge Aqsýdaǵy №3,5 jáne 8 yqsham aýdandarda ornalasqan, uzyndyǵy 4,3 shaqyrym bolatyn oramishilik jylý jelilerin qaıta jańartýǵa aýdarylady. Sońǵy 2 jylda atalǵan ýchaskelerde 40-tan astam aqaý tirkelgen. Rekonstrýktsııa jumysy 1,5 myńnan astam jergilikti turǵyndy sapaly jylýmen qamtamasyz etýge múmkindik beredi.

Pavlodar oblysy ákimdiginiń derekterine sáıkes, búgingi tańda Pavlodarda jylýmen jabdyqtaý jelileriniń uzyndyǵy 828,1 km (ortasha tozý – 82,8%), Ekibastuzda – 422,5 km (90,7%), Aqsýda – 99,1 km (59%) quraıdy. Tehnıkalyq tekserý nátıjeleri boıynsha shuǵyl jumystar júrgizilýi tıis, tozý deńgeıi asa joǵary 4 ýchaske anyqtaldy.

Esterińizge sala keteıik, QR Premer-Mınıstri Oljas Bektenov buǵan deıin Ekibastuz JEO-syn odan ári jańǵyrtýǵa: qazandyq agregattaryn kúrdeli jóndeýge jáne tundyrylǵan sý magıstralin salýǵa rezervten 3,4 mlrd teńge bólý týraly Úkimet qaýlysyna qol qoıǵan bolatyn.

Sondaı-aq aldaǵy jylytý maýsymyna daıyndyq aıasynda Kentaý, Rıdder jáne Qyzylorda jylý kózderin jańǵyrtýǵa 16 mlrd teńge, Rıdder jylý jelilerin kúrdeli jóndeýge 2,4 mlrd teńgeden astam qarajat jáne Kókshetaý qazandyqtaryn jóndeýge 816 mln teńge aýdarylǵan bolatyn.

Jylý kózderin, TKSh ınfraqurylymyn jańǵyrtý jáne jylytý maýsymyna daıyndyq protsesi QR Úkimetiniń baqylaýynda.