QR UQK ShQ dırektorynyń burynǵy orynbasary qyzmettik babyn asyra paıdalanǵany úshin sottaldy
ASTANA. QazAqparat - QR UQK Shekara qyzmeti dırektorynyń burynǵy orynbasary Serik Áshimbaev qyzmettik babyn asyra paıdalanǵany úshin sottaldy. Bul týraly QR Áskerı sotynyń baspasóz konferentsııasynda Aqmola áskerı sotynyń tóraǵasy Dáýlet Moldabaev málimdedi.
"Sot tergeýi barysynda máseleniń aq-qarasyn aıyrdyq. Ol negizinen memlekettik satyp alýlar jasaǵan kezde zańǵa qaıshy áreketterge barǵan. Sot tergeýi kezinde 240 mln. teńgeniń barlyǵy páterler alýǵa jumsalǵany anyqtaldy", - dedi D.Moldabaev.
Onyń sózine qaraǵanda, S.Áshimbaev alaıaqtyq úshin emes, qyzmettik babyn asyra paıdalanǵany úshin aıyptalyp, oǵan shartty jaza taǵaıyndaldy. Bul qylmysqa qatysy bar taǵy eki tulǵa 6 jylǵa bas bostandyǵynan aıyrylatyn boldy.
D.Moldabaev bul sot úkimi zańdy kúshine áli enbegenin aıtty.
Osyǵan deıin QR Joǵarǵy sotynyń baspasóz qyzmetinen habarlaǵandaı, QR UQK Shekara qyzmeti dırektorynyń burynǵy orynbasary Serik Áshimbaev 2014 jyly 13 aqpanda qamaýǵa alynǵan. Oǵan qyzmettik babyn asyra paıdalandy degen kiná taǵyldy.
BAQ-ta habarlanǵandaı, S.Áshimbaevpen birge QR UQK ShQ Bas tyl basqarmasy bastyǵynyń burynǵy orynbasary A.I. Nurmanov pen «Astana Finance Union» JShS dırektory M.E. Muqanovqa da aıyp taǵylǵan.
