QR UQK Shekara qyzmetiniń «KTK» komandasy A.Maslıakovpen kezdesip, halyqaralyq odaqqa qosylý máselesin talqylaıdy
ASTANA. QazAqparat - Osy jyldyń qańtar aıynda Reseıdiń Sochı qalasynda halyqaralyq «KıVıN-2015» festıvali bolyp ótti. Oǵan TMD jáne shetelderden barlyǵy 500-ge jýyq komanda qatysty.
Bul týraly QR UQK ShQ baspasóz qyzmetinen habarlady.
Al bizdiń elimizden Shekara akademııasynyń «Sovershenno sekretno» komandasy polkovnık Serik Bısekeevtiń basshylyǵymen qatysyp, júldeli orynmen oraldy, dep habarlaıdy QR UQK ShQ baspasóz qyzmetinen.
«Shekara akademııasynyń komandasy mundaı festıvalǵa daıyndyqty budan birneshe jyl buryn bastaǵan bolatyn dep aıtýymyzǵa bolady. Mundaı maqsatqa jetý úshin podpolkovnık Dáýren Belǵojınovtyń basshylyǵymen talaı repetıtsııalardyń ótkendigin bireý biler, bireý bilmes», delingen habarlmada.
«Atalǵan festıvalǵa qatysý úshin komanda jınaý, basqa da daıyndyqtar júrgizýge bas-aıaǵy eki aıdaı ýaqyt ótti. Árıne, bizdiń komanda buǵan deıin de Sochı sahnasynda óner kórsetip júrgen bolatyn. Degenmen, ár kezeńdegi festıvaldiń jóni bólek, ári komanda quramasyna jańadan músheler qosylyp jatady. Sondyqtan, daıyndyq máselesine qashanda tereń mán berý jaǵy eskerilip jatady. Onyń ústine «Sovershenno sekretno» komandasy qazaqstandyq áskerı jastar arasyndaǵy birden-bir komanda», - deıdi podpolkovnık Dáýren Belǵojaev.
Festıvaldiń qorytyndysy ótip bolmaı jatyp, «Sovershenno sekretno» komandasy kelesi festıvalǵa shaqyrtý alyp úlgerdi. Ol da halyqaralyq festıval. Atap aıtqanda, 27 qańtarda elge aıaqtary jetpeı jatyp, 10 aqpanda qaıtadan kelesi issaparǵa Reseı astanasy Máskeýge sapar shegýlerine týra kelip tur. Bul joly olardy Halyqaralyq kóńildi, tapqyrlar klýby halyqaralyq odaǵynyń prezıdenti A.V.Maslıakov pen «AMIK» JShS bas dırektory A.A. Maslıakov qabyldap, komandanyń halyqaralyq odaqqa qosý máselesin qarastyratyn bolady.
Ákeli-balaly «kvnşıkterdiń» qoldaýyna ıe bolsa, onda Máskeý men Máskeý mańy qalalarynyń lıgasyna jáne Joǵary televızııalyq lıgaǵa joldama alatyn bolady. Árıne, mundaı festıvaldar Birinshi telearnadan kórsetilip, ol oıyndy ádettegideı Aleksandr Vasılevıch Maslıakov pen onyń balasynyń júrgizetindigin jurtshylyq jaqsy biledi.
