QR UQK Shekara qyzmetiniń burynǵy basshysy 11 jylǵa sottaldy
ASTANA. QazAqparat - Búgin Qylmystyq ister jónindegi mamandandyrylǵan aýdanaralyq áskerı sotynda general-leıtenant Nurlan Aıtmanuly Jolamanovqa jáne podpolkovnık Qaırat Kópjasaruly Balmaǵambetovke qatysty qylmystyq is boıynsha sot úkimi jarııa etildi.
Bul týraly Qazaqstan Respýblıkasy Áskerı sotynyń baspasóz qyzmeti habarlady.
N. Jolamanov pen Q.Balmaǵambetov uıymdasqan qylmystyq top quryp, saýda qurylymdarynyń ókilderinen zańsyz is-áreketter úshin, ıaǵnı QR UQK Shekara qyzmetine qajetti taýar, jumys jáne qyzmet, memlekettik satyp alý júrgizý kezinde bopsalaýshylyq jolmen asa iri mólsherde aqshalaı túrde para alyp otyrǵan dep aıyptalǵan edi. Jolamanov qurǵan jáne basshylyq etken uıymdasqan qylmystyq top 2013 jyldyń jazynan 2014 jyldyń tamyz aıy aralyǵynda jalpy somasy 173 181 750 teńge jáne 436 000 AQSh dollary kólemindegi aqshany para retinde alǵan.
Sot úkimimen N.Jolamanov 11 jylǵa bas bostandyǵynan aıyrý, oǵan tıesili jeke nemese birlesken ortaq menshik úlesindegi múlkin tárkileý, ómir boıy memlekettik qyzmette jaýapty nemese basqarýshylyq qyzmetter atqarý quqyǵynan aıyrý, jazany túzeý kolonııasynyń qatań rejiminde óteýge sottaldy.
Buǵan qosa, sot Qazaqstan Respýblıkasy Prezıdentine N.Jolamanovty - «general-leıtenant» áskerı ataǵynan jáne «2-shi dárejedegi Dańq» ordeninen aıyrý týraly usynys joldaýǵa úkim etti.
N.A.Jolamanovqa qatysty qamaý túrindegi bultartpaý sharasy ózgerissiz qaldyryldy.
Q.Balmaǵambetov QR QK-niń 235-babynyń 3-bóligimen, 366-babynyń 4-bóligimen aıypty dep tanylyp, ókinish bildirgeni úshin QR QK-niń 65-babynyń talaptaryna saı qylmystyq jaýapkershilikten bosatyldy.
Q.Balmaǵambetovke qatysty úıqamaqta ustaý túrindegi sharasy úkim zańdy kúshine engennen keıin joıylatyn bolady.
Aıta keteıik, úkim zańdy kúshine engen joq.
